Në një atmosferë të mbushur me nostalgji, pasion dhe histori të rralla, mbrëmë u mbajt eventi i publikimit të librit “Historia e Muzikës Rock ‘n’ Roll në Kosovë – Vitet ‘60”, një projekt i veçantë i Qendrës së Kulturës Alternative – Defy Them, raporton Katror.info.
Kjo mbrëmje shënoi jo vetëm një arritje botuese, por edhe një pikë kthese në dokumentimin e trashëgimisë muzikore moderne të Kosovës.
Aty u mblodhën dashamirës të muzikës, studiues, muzikantë dhe personalitete që kanë kontribuar në skenën e rock-ut vendor. Pjesëmarrësit u bënë dëshmitarë të diskutimeve të vlefshme rreth fillesave të kësaj lëvizjeje muzikore në vitet ’60, një kohë shpesh të lënë në harresë në rrëfimet zyrtare kulturore.
Mundesh me e lexu edhe…
Paneli diskutues i ngjarjes përfshinte emra të njohur si Liburn Jupolli, Arsim Canolli, Sheki Hoxha, Agim Berisha, Adora Limani, Tringa Sefedini dhe Enis Bytyqi, të cilët ndanë përvoja dhe reflektime mbi zhvillimin e muzikës rock në Kosovë. Ngjarja u moderua nga Arif Muharremi, me një ndjeshmëri të veçantë ndaj temës dhe pasionit të panelistëve.
Një arkiv për brezat e ardhshëm
Libri është rezultat i një pune të përbashkët redaktuese nga Arsim Canolli dhe Liburn Jupolli, ndërsa puna hulumtuese u realizua nga një ekip i përkushtuar: Olisa Çekaj, Adora Limani, Afrim Visoka, Enis Bytyqi, Tringa Sefedini. Katalogu është hartuar nga Olisa Çekaj dhe Liburn Jupolli, ndërsa dizajni mbresëlënës i është besuar ekipit Envinion.
Projekti është udhëhequr nga Kombëtar Uskana, me koordinim nga Lira Blakaj dhe Ylber Havolli, lektorim nga Edita Pozhegu, dhe është mbështetur nga Komuna e Prishtinës dhe Swiss Agency for Development and Cooperation (SDC).
“Historia e Muzikës Rock ‘n’ Roll në Kosovë – Vitet ‘60” nuk është vetëm një botim – është një dokument i rëndësishëm që arkivon rrënjët e një zhanri që, përtej tingujve, ka përfaqësuar shpirtin e rebelimit, kreativitetit dhe shpresës në Kosovë.
Libri mund të gjendet tashmë në në Defy Them dhe shumë shpejt edhe në libraritë lokale dhe online./Katror.info
