Ndërsa gjyqtarët e Gjykatës së Lartë shqyrtojnë të ardhmen e TikTok-ut në Shtetet e Bashkuara, një numër në rritje i përdoruesve amerikanë të mediave sociale kanë reaguar duke kaluar në një alternativë të papritur: Xiaohongshu, një aplikacion tepër i popullarizuar i mediave sociale në Kinë.
Aplikacioni, i njohur si ‘Libri i Vogël i Kuq’ dhe shpesh i quajtur nga përdoruesit amerikanë si ‘RedNote’, arriti në vendin e parë në listën e App Store në SHBA të martën, shkruan CNN, përcjell Katror.info.
I themeluar në vitin 2013, Xiaohongshu është një nga platformat më të mëdha të mediave sociale në Kinë me 300 milionë përdorues, sipas kompanisë hulumtuese ‘Qian Gua’.
Mundesh me e lexu edhe...
Përshkruar si versioni kinez i Instagram-it, aplikacioni është bërë veçanërisht i njohur për ndarjen e këshillave mbi udhëtimet, grimin dhe modën.
Por ndërsa ka dominuar tregun kinez, deri më tani nuk ka fituar shumë rëndësi përtej botës kinezo-folëse.
Pse është Xiaohongshu kudo?
Xiaohongshu po përjeton një rritje të madhe të popullaritetit në të njëjtën javë kur TikTok mund të dalë jashtë funksionit në SHBA.
Shkarkimet e aplikacionit Xiaohongshu nga pajisjet mobile në SHBA pothuajse u trefishuan gjatë javës së fundit, krahasuar me shtatë ditët para saj, tha për CNN të martën kompania e inteligjencës së tregut ‘Sensor Tower’, me seli në San Francisko.
Brenda dy ditëve, më shumë se 700,000 përdorues të rinj iu shtuan Xiaohongshu, raportoi Reuters, duke cituar një person pranë kompanisë.
Që nga e mërkura, hashtag-u ‘TikTok refugee’ kishte mbledhur gati 250 milionë shikime dhe mbi 5.5 milionë komente. Shumë përdorues amerikanë e shihnin bashkimin e tyre si një akt sfidues ndaj lëvizjes së Uashingtonit për TikTok-un.
“Qeveria jonë ka dalë mendsh nëse mendojnë se do ta pranojmë këtë ndalim të TikTok-ut,” tha një përdoruese me emrin Heather Roberts në një video-mesazh në Xiaohongshu, që ka mbledhur më shumë se 45,000 pëlqime.
“Thjesht po kalojmë në një aplikacion të ri kinez, dhe ja ku jemi” tha ajo.
“Ky është shumë më i mirë se TikTok,” tha një tjetër person i vetëdeklaruar në një video-mesazh.
“Amerikanët po vijnë këtu më vjen keq nëse do të na urreni, por premtoj se do të bëjmë më të mirën” tha ai.
Si po ndërveprojnë përdoruesit kinezë dhe amerikanë në platformë?
Migrimi i papritur i përdoruesve amerikanë në Xiaohongshu ka krijuar një platformë të pazakontë për ndërveprime midis përdoruesve kinezë dhe amerikanë.
“Thjesht dua t’ju siguroj se duam të gjejmë një mënyrë për të komunikuar me ju dhe të tregojmë respekt për komunitetin tuaj,” tha një përdorues.
Disa prej përdoruesve të rinj amerikanë i kanë bërë thirrje bashkëkombësve të tyre të tregojnë respekt për përdoruesit kinezë në platformë.
“Një mesazh i shkurtër për përdoruesit amerikanë që po vijnë këtu: Ju lutem, mos sillni politikën këtu. Duam të argëtohemi, të kënaqemi dhe të tregojmë respekt për njerëzit që janë këtu tashmë,” postoi një përdorues.
Shumica e përdoruesve kinezë i kanë mirëpritur ngrohtësisht të ardhurit, madje disa prej tyre kanë ndarë video me udhëzime për të ndihmuar ‘refugjatët e TikTok-ut’ të rinj të orientohen në aplikacion.
“Ky mund të jetë një moment historik,” komentoi një përdorues kinez.
“Duket sikur shumë gjëra kanë ndryshuar menjëherë. Njerëzit e zakonshëm nga të dy vendet tona nuk kanë pasur kurrë mundësinë të lidhen më parë, shpresoj që të gjithë të marrin këtë mundësi të shkurtër për shkëmbime domethënëse idesh” tha ai.
Një person madje e shfrytëzoi këtë mundësi për të kërkuar ndihmë me detyrat e shtëpisë për në gjuhën angleze, në një postim viral që mblodhi mbi 2,000 pëlqime.
Ivy Yang, analiste e teknologjisë kineze dhe themeluese e firmës konsulente ‘Wavelet Strategy’, tha se përdoruesit amerikanë të rinj kishin “krijuar në mënyrë të papritur një nga format më organike të shkëmbimit kulturor midis SHBA-së dhe Kinës që kemi parë vitet e fundit.”
“Përdoruesit po gjejnë mënyra krijuese për të kapërcyer pengesat gjuhësore, për të njohur dallimet kulturore dhe për të bashkëjetuar në mënyra magjepsëse,” shtoi ajo.
“Ky ndërtim i komunitetit që po ndodh në kohë reale mund të ketë një ndikim të qëndrueshëm, dhe unë jam me shpresë të kujdesshme” shtoi ajo.
Në një periudhë të shkurtër në vitin 2021, shkëmbime të ngjashme u panë gjithashtu në aplikacionin e mediave sociale Clubhouse, ku përdoruesit kinezë dhe amerikanë zhvilluan dialog të pacensuruar për tema delikate në dhoma virtuale bisede, para se cenzorët kinezë të ndërhynin për ta bllokuar aplikacionin.
Sipas firmës së inteligjencës mediatike ‘PeakMetrics’, deri të martën, vetëm një ‘pjesë shumë e vogël’ e postimeve në Xiaohongshu trajtonin tema delikate në Kinë, ku diskursi online censurohet me kujdes.
Si ndryshon Xiaohongshu nga TikTok?
Së pari, Xiaohongshu nuk është projektuar për folësit e anglishtes, ndërsa ‘TikTok’ nuk është në përdorim fare në Kinë.
Një nga veçoritë kryesore të aplikacionit është algoritmi i tij i përmbajtjes, i cili fokusohet në interesat e përdoruesve në vend të njerëzve që ata ndjekin. Disa përdorues thonë se kjo nxit përmbajtje më origjinale dhe redukton dominimin e influencerëve të fuqishëm.
Kompania pas aplikacionit, ‘Xingin Information Technology’, u themelua nga Charlwin Mao dhe Miranda Qu dhe ka selinë në Shangai.
Ndërkohë, TikTok zotërohet nga kompania kineze ‘ByteDance’ dhe është projektuar për një audiencë globale. TikTok nuk është i qasshëm në Kinë, ku një aplikacion tjetër ‘motër’, Douyin, shërben për tregun vendas.
A po kalojnë përdoruesit amerikanë të TikTok-ut në aplikacione të tjera përveç Xiaohongshu?
Lemon8, një aplikacion komuniteti për stilin e jetesës gjithashtu në pronësi të ‘ByteDance’, aktualisht renditet si aplikacioni i dytë më i shkarkuar në dyqanin e Apple në SHBA.
‘Lemon8’ ka një funksion të ngjashëm për ndarjen e videove si ‘TikTok’. I modeluar sipas Instagram-it dhe Pinterest-it, aplikacioni u lansua për herë të parë në SHBA në vitin 2023.
Nuk është ende e qartë nëse ndalimi i ‘TikTok-ut’ mund të rrezikojë gjithashtu operacionet e ‘Lemon8’ në SHBA.
Ligji i SHBA-së i miratuar vitin e kaluar përcakton që kërkesa për shitje ose ndalim do të zbatohet përgjithësisht për të gjitha aplikacionet që janë në pronësi ose operohen nga ‘ByteDance’, që do të thotë se, edhe pse ‘Lemon8’ nuk u përmend shprehimisht në ligj, ndalimi mund të shtrihet edhe në këtë platformë. /Katror.info
Përgatiti:
