Udhëtimet me tren në Evropë po përjetojnë një ringjallje të madhe, kryesisht sepse ato ofrojnë një mënyrë të ngadaltë, të qetë dhe pa stres për të dalë nga rrugët e zakonshme të turizmit.
Evropa këtë vit ka pasur një nga verat më të ngarkuara ndonjëherë, me disa vende që kanë regjistruar nivele rekord të vizitorëve. Vetëm në gusht, më shumë se 11 milionë turistë ndërkombëtarë vizituan Spanjën, pavarësisht protestave të shumta kundër turizmit masiv – një rritje prej 2.9% krahasuar me të njëjtin muaj të vitit 2024.
Ndërkohë, në Dolomitet italiane, një nga shtigjet më të njohura të ecjes në malin Seceda priti rreth 8 mijë turistë në një ditë të vetme.
Mundesh me e lexu edhe…
Kjo rritje e madhe e fluksit turistik ka shkaktuar ankesa për mbingarkesë turistike në të gjithë kontinentin. Kur kësaj i shtohen temperaturat përvëluese dhe taksat e larta të turizmit, udhëtimet gjatë stinës së qetë të vjeshtës dhe dimrit janë bërë edhe më tërheqëse.
Prandaj, nëse dëshiron të përfitosh nga qetësia e muajve të ftohtë, pse të mos shijosh ngjyrat e vjeshtës përmes një udhëtimi me tren?
Kompania japoneze JR Pass ka analizuar rrugët më të vlerësuara të trenave në Europë duke marrë parasysh vlerësimet online, motin sezonal dhe popullaritetin në rrjete sociale. Ja pesë prej udhëtimeve më të rekomanduara për këtë stinë.
Linja GoldenPass, Zvicër
Një nga udhëtimet më të famshme në botë, GoldenPass Line përshkon 191 km nga Montreux në Interlaken, duke ofruar pamje mahnitëse të Alpeve Zvicerane, liqenit të Gjenevës dhe maleve Mont Blanc, Matterhorn dhe Eiger.
Rruga kalon pranë kështjellës mesjetare Chateaux de Chillon dhe akullnajës Tsanfleuron, në 3 mijë metra lartësi.
Biletat e klasit të dytë kushtojnë rreth 60 euro, pa rezervim vendi.
Tren de Soller, Mallorca, Spanjë
Një alternativë më e ngrohtë dhe plot diell është Treni i Soller, i ndërtuar në vitin 1912. Linja elektrike kalon mes maleve dhe plantacioneve me agrume, duke lidhur Soller me Palmën.
Në stacionin kryesor ndodhen ekspozita me vepra origjinale të Picasso dhe Miró. Pamjet e Katedrales së Santa Maria dhe maleve të Serra de Tramuntana e bëjnë këtë udhëtim një përvojë të paharrueshme.
Biletat vajtje-ardhje kushtojnë 40 euro.
Linja e Rodopit, Bullgari
Një nga peizazhet më të paprekura në Europë gjendet në këtë rrugë që lidh Luginën e Gornotrakiyska me malet Rhodope dhe Pirin.
Treni përshkon 125 km përmes pyjeve të artë të fletëverdhëve dhe fshatrave të vogla tradicionale.Udhëtimi ofron mundësi për ecje në natyrë dhe pamje mahnitëse të maleve bullgare.
Biletat për turne ditor fillojnë nga 79 euro, por çmimet ndryshojnë sipas datës.
Linja Semmering, Austri
Një mrekulli inxhinierike e ndërtuar në shekullin XIX, Semmering Railway është linja e parë hekurudhore që kalon një qafë të lartë malore.
Rruga nga Gloggnitz në Mürzzuschlag zbulon ura guri, tunele të gdhendura dhe peizazhe me ngjyra të ndezura vjeshte.
Biletat standarde fillojnë nga 8.90 euro për udhëtimin 36-minutësh.
Linja Schneeberg, Austri
Një nga hekurudhat e fundit në Europë, kjo linjë çon udhëtarët në stacionin Hochschneeberg, në 1,800 metra lartësi.
Në stacionin Baumgartner, vizitorët mund të ndalojnë për të shijuar buchteln tradicionale — ëmbëlsira të mbushura me reçel.Në majë, peizazhet malore ofrojnë pamje panoramike mbresëlënëse.
Biletat e kombinuara, që përfshijnë edhe udhëtimin me teleferik, fillojnë nga 23.50 euro. /AP/Katror.info
