RTK flet italisht: Transmetohen filma dhe seriale të prodhuara nga RAI

Radiotelevizioni i Kosovës ka nënshkruar marrëveshje me Ambasadën dhe Institutin Italian të Kulturës në Tiranë. Në ceremoni përveç krerëve të dy institucioneve, ishte i pranishëm edhe kryeministri Albin Kurti.

Sipas kësaj marrëveshje, dy seriale, katër filma dhe gjashtë dokumentarë të prodhuar nga Radiotelevizioni italian do të transmetohen vitin e ardhshëm në Radio Televizionin e Kosovës, në gjuhën origjinale dhe me titra në gjuhët vendase.

“Paketa” përfshin prodhime cilësore të prodhuara së fundmi, si serialet televizive “Cuori” dhe “Mina Settembre”, filmat “Hija e ditës”, “E drejta e lumturisë”, “Tina Anselmi”, “Carosello Carosone” dhe dokumentarët “Sergio Marchionne”, “Enzo Ferrari”,  “Fellini. Io sono un clown – Fellini. Unë jam një kloun”, “Infinito. L’universo di Luigi Ghirri – Pafundësi. Universi i Luigi Ghirrit, “Ezio Bosso” dhe “Lion’s Share”.

Programet do të transmetohen në “prime time”, përkatësisht në orare me shikueshmëri të lartë, me titra në shqip (RTK1) dhe serbisht (RTK2).

Nënshkrimi i marrëveshjes u bë sot në Prishtinë, në ambientet e Radio Televizionit të Kosovës, në prani të Kryeministrit Kurti dhe ambasadorit italian Antonello De Riu nga Drejtori i Përgjithshëm i RTK-së Shkumbin Ahmetxhekaj  dhe drejtori të IIK-së në Tiranë Alessandro Ruggera.

“Kemi të bëjmë me një projekt të rëndësisë strategjike, përmes të cilit sjellim publikun kosovar më afër gjuhës dhe kulturës italiane, përmes prodhimeve argëtuese të nivelit të lartë të garantuar nga marka RAI. Një nismë që nënkupton edhe një mesazh politik, siç dëshmon fokusi në dy gjuhët zyrtare të vendit, ku përsëri Italia bëhet një urë mes komuniteteve të Kosovës, të cilat dëshirojnë të jetojnë së bashku në paqe dhe të integruara”, ka thënë ambasadori De Riu.

“I jemi jashtëzakonisht mirënjohës Ambasadës dhe Institutit të Kulturës për këtë projekt, me të cilin Italia konfirmon mbështetjen e saj për Televizionin publik të Kosovës, një televizion që synon të flasë me të gjithë pa dallim. Në Kosovë ka shumë kërkesë për Italinë dhe përmes produksioneve që kemi përzgjedhur si ato për Enzo Ferrari, Federico Fellini, Renato Carosone apo tetëdhjetëvjetorin e Festivalit të Filmit në Venecia, jam i bindur se interesi do të rritet edhe më shumë”, theksoi drejtori i përgjithshëm i RTK-së, Ahmetxhekaj.

Në ditët në vijim do të nënshkruhet një kontratë pasqyrë mes RTK-së dhe RAI.com. Prodhimet kryesore të “ciklit italian” që do të transmetohen në RTK në vitin 2024 janë dy serialet televizive”Cuori” dhe ” Mina Settembre”, të dyja të prodhuara në vitin 2021, episodet e të cilave janë parë në Itali nga miliona shikues.

Në serinë e parë, historia zhvillohet në Torino në fund të viteve gjashtëdhjetë, ku mes punës dhe ndjenjave shpesh kontradiktore, një grup kardiologësh përpiqen të revolucionarizojnë mjekësinë duke eksperimentuar me teknika të reja për të shpëtuar sa më shumë jetë që është e mundur.

Seriali i dytë televiziv, i bazuar lirshëm në tregimet e shkrimtarit Maurizio De Giovanni, fokusohet në një asistente sociale, Mina, e cila punon në një qendër këshillimi familjar në qendrën historike të Napolit, e ndarë mes kërkimit të vazhdueshëm për një zgjidhje të problemeve të të tjerëve dhe një jetë dashurie disi të pasigurt.

Marrëveshja është realizuar në kuadër të një projekti të veçantë të promovuar nga Ministria e Punëve të Jashtme dhe Bashkëpunimi Ndërkombëtar Italian, përkatësisht Drejtoria e Përgjithshme për Diplomacinë Publike dhe Kulturore, në bashkëpunim me Ambasadën Italiane në Prishtinë, Institutin Italian të Kulturës së Tiranës, i cili është kompetent edhe për Kosovën, dhe RAI.Com, filial i Rai Group i cili promovon dhe shpërndan të drejtat e përmbajtjes RAI në Itali dhe në mbarë botën./Katror.info