Një tjetër protestë do të zhvillohet sot organizuar nga Sindikata e Punëtorëve të RTK-së (SPERTK), aty ku thuhet se do të bëhen publik hapat e mëtejmë, përfshirë nisjen e grevës dhe bojkotit të punës, nëse situata nuk ndryshon sa i përket pagave për rreth 700 punëtorët e mediumit publik.
Kjo sindikatë këtë e ka quajtur thirrje për mobilizim të madh, për siç kanë thënë, për të mbrojtur të drejtat dhe dinjitetin e punëtorëve të RTK-së.
“Më 13 nëntor 2025, në ora 11:15, para objektit të RTK-1, zhvillohet protesta e dytë me radhë e organizuar nga Sindikata e Punëtorëve të RTK-së (SPERTK). Kjo është një thirrje për mobilizim të madh dhe pjesëmarrje masive nga të gjithë punëtorët pa dallim sektori, pozite apo përvoje. Zëri ynë i përbashkët është forca më e madhe për të mbrojtur të drejtat dhe dinjitetin e punëtorëve të RTK-së. Ftojmë gjithashtu mediat e vendit që ta mbulojnë këtë protestë dhe të shprehin solidaritet me punonjësit e Radiotelevizionit Publik. Gjatë protestës së nesërme do të bëhen publik hapat e mëtejmë, përfshirë nisjen e grevës dhe bojkotit të punës, nëse situata nuk ndryshon”, thuhet në thirrjen e SPERTK për protestë.
Mundesh me e lexu edhe...
Kjo është protesta e dytë e thirrur nga kjo sindikatë, pas asaj të 6 nëntorit që u mbajt po ashtu para hyrjes së televizionit publik.
Punëtorët e RTK-së vazhdojnë të jenë pa paga derisa data shënon 13 nëntor.
Bashkimi i Sindikatave të Pavarura të Kosovës (BSPK) ka shprehur mbështetje për protestën e paralajmëruar nga Sindikatës së Punëtorëve të Radio Televizionit të Kosovës (SPERTK), e cila do të mbahet të enjten, më 13 nëntor 2025, para hyrjes, në objektin e RTK-së.
Edhe Sindikata e Bashkuar e Arsimit, Shkencës dhe Kulturës e Kosovës (SBASHK) ka dalë në përkrahje të protestës që për nesër është thirrur nga Sindikata e Punëtorëve të RTK-së (SPERTK). /RTK/Katror.info
