Mbledhja e katërmbëdhjetë e Senatit të Universitetit të Prishtinës ka rezultuar me miratimin e disa prej rregulloreve kryesore, që sipas UP-së do të vendosin rregulla të qarta për avancimet e personelit dhe rekrutimin e diasporës akademike.
“Me disa plotësime të dakorduara të versionit të fundit, senatorët njëzëri miratuan Rregulloren për transferim, programin “Brain Gain” dhe rastet e nevojës së jashtëzakonshme të rekrutimit të personelit akademik, që synon sjelljen në UP të kuadrove të talentuar dhe ndërkombëtarisht konkurrues me ndonjë shkallë shkollimi të kryer në 400 universitetet më të mira në botë”, thuhet në njoftimin e UP-së.
Tjetër rregullore që u miratua nga senatorët e Seantit të UP-së është edhe ajo për procedurat përzgjedhëse lidhur me emërimin, avancimin dhe rizgjedhjen e personelit akademik në Universitetin e Prishtinës.
Mundesh me e lexu edhe…
Po kështu është votuar edhe rregullorja e veçantë e Fakultetit të Arteve për të njëjtën çështje.
“Këto tri rregullore kanë për qëllim standarde të larta për avancimet në UP dhe rekrutimin e personelit cilësor, në mënyrë që të ngrihet në vazhdimësi niveli i mësimdhënies dhe kërkimit shkencor në universitetin numër një të vendit e përtej. Të tri rregulloret e aprovuara sot, janë në harmoni me Statutin e Universitetit të Prishtinës që hyri në fuqi në korrik të vitit 2024”, thuhet në njoftimin e UP-së rreth vendimeve të marra një ditë më parë, më 30 prill.
Ndërkohë, bëhet e ditur se për shkak të disa ndryshimeve e plotësimeve, u shtynë për t’u shqyrtuar dhe votuar në mbledhjen e muajit maj, Rregullorja për punën dhe procedurat në Këshillin e Etikës të Universitetit të Prishtinës, Kodi etik për personelin akademik të këtij universiteti dhe shpallja e konkursit për bashkëpunëtorë të jashtëm vendas e ndërkombëtarë të UP-së, bashkë me vazhdimin e angazhimit të bashkëpunëtorëve aktualë.
Senati, gjithashtu, ka aprovuar hapjen e konkursit për studentë ndërkombëtarë në programet e përbashkëta të Fakultetit Juridik dhe atë të Inxhinierisë së Ndërtimit dhe ratifikoi një temë doktorate e miratoi një temë tjetër të këtij niveli të studimeve dhe mentorin e saj./RTK/Katror.info
