Në një nga momentet më të paharrueshme të këtij edicioni të Festivalit të Filmit në Kanë, regjisori norvegjez Joachim Trier u prit me një duartrokitje rekord prej 15 minutash në këmbë, pas premierës botërore të filmit të tij më të ri, “Sentimental Value”. Kjo është koha më e gjatë që publiku i festivalit i ka kushtuar ndonjë filmi në garën zyrtare këtë vit.
Filmi, që trajton një histori delikate familjare të vendosur në Oslo, është përshëndetur nga kritika për ndjeshmërinë emocionale dhe mjeshtërinë regjisoriale, duke e kthyer menjëherë në favorit për çmimin prestigjioz Palme d’Or.
Në qendër të rrëfimit është Gustav Borg (luajtur nga Stellan Skarsgård), një regjisor norvegjez i larguar prej kohësh nga skena e filmit, i cili përpiqet të rikthejë lidhjen me dy vajzat e tij – Nora (Renate Reinsve), një aktore në ngritje, dhe Agnes (Inga Ibsdotter Lilleaas), një nënë me një djalë të vogël. Gustav përpiqet të afrohet me Norën përmes një skenari filmi, por kur ajo refuzon të bashkëpunojë, ai i drejtohet një aktoreje të re nga Hollivudi, Rachel Kemp (Elle Fanning).
Mundesh me e lexu edhe…
Edhe pse “Sentimental Value” përmban disa komente ironike mbi botën e filmit, ajo që e veçon është intensiteti emocional dhe ndërtimi i hollë i marrëdhënieve njerëzore, veçanërisht dinamika komplekse midis babait dhe vajzës së tij, e trajtuar me ndjeshmëri dhe elegancë.
Në konferencën për shtyp pas premierës, Skarsgård me zërin e ngjirur, që ia atribuoi festës së një nate më parë – foli me emocione për përfshirjen në projekt. Nga ana tjetër, vetë Trier deklaroi se filmi është një reflektim personal mbi artin, familjen dhe kohën që kalon.
Filmi është pritur jashtëzakonisht mirë nga mediat ndërkombëtare, me shumë kritikë që tashmë e cilësojnë si “filmi më i mirë i vitit”.
Ai është blerë për tregun amerikan nga kompania prestigjioze Neon, e njohur për shpërndarjen e filmave të suksesshëm si “Parasite” dhe “Portrait of a Lady on Fire”. /Katror.info
Përgatiti:
