Sevdije Kastrati Dill bëhet anëtare e American Society of Cinematographers (Shoqatës Amerikane të Kinematografistëve), një ndër organizatat më prestigjioze në industrinë e kinematografisë, shkruan Katror.info.
ASC, e themeluar në vitin 1919 në Shtetet e Bashkuara, është shoqatë elitare që përfaqëson disa nga kinematografët më të njohur në botë dhe synon të avancojë artin dhe shkencën e kinematografisë.
Pranimi në këtë shoqatë konsiderohet një vlerësim i madh profesional, duke qenë se anëtarësia përfshin regjisorë/e të zgjedhur për kontributin dhe ekselencën e tyre në industrinë e filmit.
Mundesh me e lexu edhe…
Sevdije Kastrati Dill, emër i njohur në kinematografinë kosovare dhe ndërkombëtare, ka ndërtuar karrierë të suksesshme si kinematografiste, duke u fokusuar kryesisht në projekte që trajtojnë të drejtat e njeriut.
E lindur dhe e rritur në Kosovë, ajo ishte vetëm 15 vjeç dhe po përgatitej për një karrierë në mjekësi kur lufta shpërtheu në Kosovë. Humbja e nënës dhe motrës gjatë konfliktit e ndryshoi rrënjësisht rrugëtimin e saj jetësor. Pikërisht këto përvoja e afruan me botën e kinemasë, ku gjeti mënyrën më të fuqishme për të rrëfyer histori dhe për të adresuar çështje të rëndësishme shoqërore përmes fuqisë së imazhit.
Në vitin 2009, ajo u zhvendos në Shtetet e Bashkuara për të ndjekur studimet në kinematografi në Institutin Amerikan të Filmit (AFI), ku përfundoi studimet me titullin Master i Arteve të Bukura (MFA) në vitin 2011. Që atëherë, ajo ka punuar në një sërë projektesh artistike dhe dokumentare.
Në kinemanë kosovare, Sevdija ka dhënë kontribut të rëndësishëm me filma si Vera Andrron Detin, Zana, Nëntori i Ftohtë dhe Martesa. Filmat Martesa dhe Zana ishin përzgjedhjet zyrtare të Kosovës për çmimin Oscar në kategorinë e Filmit më të Mirë Ndërkombëtar përkatësisht në vitet 2018 dhe 2019.
Përveç angazhimeve në filma artistikë, Sevdija ka punuar edhe në dokumentarë që trajtojnë çështje shoqërore dhe të drejtat e njeriut, duke përfshirë Killing County, Urban Nightmares dhe The Kingdom of Coal.
Pranimi i saj në Shoqatën Amerikane të Kinematografistëve (ASC) shënon një tjetër arritje të rëndësishme në karrierën e saj, duke e vendosur atë në mesin e kinematografëve më të shquar në botë. Ky sukses është gjithashtu një dëshmi e kontributit të saj të vazhdueshëm në industrinë e filmit dhe një shembull frymëzues për kinematografinë kosovare./Katror.info
Përgatiti:
