Ikona e muzikës latine Shakira filloi turneun e saj të parë botëror pas shtatë vitesh të martën në Rio de Zhaneiro, për albumin e saj të fundit, Las mujeres ya no lloran (Gratë nuk qajnë më – ed.), i cili së fundi fitoi një Grammy.
Kolumbianja me një stil eklektik i vuri flakën stadiumit Olimpik Nilson Chaves me kapacitet 46 mijë vende, duke alternuar hitet e saj më të njohura me këngë nga albumi i saj i 12-të, shkruan Albanian Post.
Këngëtarja performoi veçanërisht Shakira: Bzrp Music Sessions, Vol. 53, një këngë që u bë virale në platformat e transmetimit dhe i bën jehonë ndarjes së saj shumë të përfolur nga ish-futbollisti spanjoll Gerard Piqué në qershor 2022.
Mundesh me e lexu edhe…
“Muzika shëron”, i tha Shakira audiencës, në një thirrje për “rezistencë”.
“Të duash dikë tjetër është e mrekullueshme, por është më mirë të duash veten”, tha ajo.
Ky është turneu i parë që nga viti 2018 për yllin kolumbian, e cila fitoi famë globale me Whenever, whenever në vitin 2001.
Nga pop në reggaeton, me një devijim nëpër salsa dhe bachata domenikane, Shakira doli në skenën e Rio-s për dy orë e gjysmë, disa ditë pasi mori Grammy-in për albumin më të mirë latin pop.
Një çmim që ajo ia kushtoi emigrantëve, të cilët janë kërcënuar me dëbim nga Shtetet e Bashkuara prej presidentit Donald Trump.
Ylli kolumbian ka krijuar gjithashtu vepra klasike si Hips Don’t Lie, Chantaje dhe Waka Waka, himni i Kupës së Botës FIFA 2010 në Afrikën e Jugut.
Me mbi 90 milionë disqe të shitura në mbarë botën dhe katër Grammy në Shtetet e Bashkuara, mes një morie çmimesh të tjera, Shakira është një nga artistet latine më të njohura të të gjitha kohërave.
Gjatë këtij turneu, ajo është planifikuar të përformojë rreth 50 evente në Amerikën Latine, pastaj në Shtetet e Bashkuara dhe Kanada, deri në fund të qershorit./Katror.info
Përgatiti:
