Nata e dytë e Sunny Hill Festival 2025 ka sjellë energji shpërthyese dhe emocione të forta për mijëra pjesëmarrës në zemër të kryeqytetit. Pas një nate të parë spektakolare me Dua Lipën dhe Fatboy Slim, mbrëmja e së premtes u dominua nga performancat elektrizuese të Shawn Mendes dhe Mochakk.
Ylli kanadez i popit, Shawn Mendes, i njohur për hitet si Señorita, Treat You Better dhe There’s Nothing Holdin’ Me Back, i magjepsi të pranishmit me një set emocional dhe dinamik. Në një atmosferë ku çdo fjalë këndohej nga turma, Mendes u shndërrua në një prej yjeve më të ndritshëm të natës.
Ndërkohë, DJ-i brazilian Mochakk, emri i vërtetë i të cilit është Pedro Maia, mbajti skenën gjallë me ritme house dhe techno, duke sjellë energjinë e festivaleve globale drejt Prishtinës. 25-vjeçari, tashmë në mesin e 100 DJ-ve më të mirë në botë, e ngriti atmosferën në kulm me setin e tij karizmatik.
Mundesh me e lexu edhe…
Sunny Hill Festival, që ka nisur në vitin 2018, është shumë më tepër se një festival muzikor – është një ngjarje që bashkon kulturën, artin dhe energjinë kreative të brezit të ri në Kosovë. Edicioni i këtij viti ka tërhequr vëmendjen ndërkombëtare, falë një line-up-i të përzgjedhur me kujdes.
Sot, në natën përmbyllëse të edicionit 2025, skena do t’u përkasë yjeve si Peggy Gou dhe Anyma, duke premtuar një mbrëmje tjetër të paharrueshme./Katror.info
