Kasta e aktorëve të teatrit “Hadi Shehu” do të shfaqë sonte premierën e shfaqjes “Vojçeku”, e cila është realizuar me regji të Zana Hoxhës. Shfaqja paraqet një portret emocional të vuajtjes njerëzore dhe është vendosur në Berlin, në vitin 1981.
Në një lidhje direkte me RTK, regjisorja Zana Hoxha ndau detaje rreth përgatitjeve të shfaqjes. Ajo theksoi se puna intensive ka filluar që muajin e kaluar dhe ka kërkuar angazhim të madh nga ekipi.
“Kemi filluar me përgatitje muajin e kaluar dhe kemi punuar intensivisht. Është një shfaqje e madhe që ka kërkuar angazhim të madh,” shpjegoi Hoxha.
Regjisoria gjithashtu diskutoi rëndësinë e trajtimit të traumave dhe pasojat që ato mund të kenë kur nuk trajtohen ose trajtohen gabimisht. Ajo u shpreh se këto trauma mund të jenë fatale për individët dhe ata që janë rreth tyre, duke theksuar se kjo është një temë shumë relevante dhe e ndjeshme në shoqërinë tonë.
“Traumat e caktuara që nuk trajtohen ose trajtohen gabimisht mund të kenë pasoja fatale jo vetëm për personin që i përjeton, por edhe për ata që janë rreth tij. Kjo temë është shumë relevante dhe e ndjeshme dhe është e pranishme në shoqërinë tonë,” tha ajo.
Hoxha e lidh këtë temë edhe me Gjakovën, duke theksuar se kjo është një shoqëri që ka kaluar shumë vuajtje gjatë luftës, dhe që pas luftës nuk është punuar mjaftueshëm për të trajtuar stresin post-traumatik. Ajo shpjegoi se përtej rindërtimit fizik të shtëpive, shpirtërat kërkojnë gjithashtu një trajtim të kujdesshëm.
“Gjakova, siç e dimë, ka përjetuar shumë gjatë luftës dhe pas luftës nuk është punuar mjaftueshëm për të trajtuar stresin post-traumatik. Kemi menduar se me rinovimin e shtëpive rinovohet edhe shpirti, por shpirti kërkon një trajtim të kujdesshëm,” shtoi ajo.
Hoxha theksoi se trajtimi i këtyre temave duhet të jetë një prioritet për qeverinë dhe se si regjisore, qëllimi i saj është të trajtojë tema relevante për shoqërinë dhe vendin ku realizohet shfaqja.
“Trajtimi i këtij stresi duhet të jetë një prioritet për qeverinë. Unë si regjisore kam për qëllim të trajtoj tema që janë relevante për vendin ku bëj shfaqjen, dhe kam menduar se kjo temë është shumë relevante për Gjakovën,” tha Hoxha.
Në shfaqje luajnë: Bujar Ahmeti, Vlora Dervishi, Edi Kastrati, Aurita Agushi, Arbies Komoni, Altina Kusari dhe Eden Kastrati.
Shfaqja është realizuar nga teatri “Hadi Shehu” në Gjakovë, në partneritet me Qendrën për Art dhe Komunitet “Artpolis”./Katror.info
Përgatiti:
