Një studim i ri ka zbuluar se akti i thjeshtë i shikimit të një vepre arti vizuale mund të përmirësojë ndjeshëm mirëqenien tonë. Ky efekt pozitiv është vërejtur jo vetëm në galeritë e artit, por edhe në spitale dhe përmes realitetit virtual.
Studimi përfshiu rishikimin e 38 hulumtimeve të mëparshme me një total prej 6 mijë e 805 pjesëmarrësish, i kryer nga një ekip psikologësh nga Universiteti i Vjenës, Trinity College Dublin dhe Universiteti Humboldt i Berlinit, raportoi Neuroscience.
Veprat e përfshira në analizë ishin kryevepra si “The Scream” nga Edvard Munch, “The Starry Night” nga Vincent Van Gogh dhe shumë vepra të tjera moderne dhe bashkëkohore.
Mundesh me e lexu edhe…
Studimi konfirmoi se artet pamore – qofshin piktura figurative apo abstrakte, fotografi, skulptura apo instalacione – ndikojnë pozitivisht në ndjenjën dhe stabilitetin emocional.
“Shpesh mendohet se arti është një luks, por kërkimi ynë tregon se shikimi i veprave të artit mund të ndihmojë në mënyrë domethënëse mirëqenien”, tha MacKenzie Trupp, autori kryesor nga Universiteti i Vjenës.
“Ndërkohë që përfitimet e krijimit të artit janë studiuar gjerësisht, ndikimi i shikimit të veprave të artit ka qenë i nënvlerësuar. Arti vizual është i pranishëm dhe i qasshëm kudo – në muze, galeri, spitale dhe shtëpi”, shpjegoi Claire Howlin, profesoreshë në Shkollën e Psikologjisë, Trinity College Dublin.
Që prej vitit 2019, është rekomanduar përdorimi i qasjeve kreative së bashku me kujdesin klinik. Arti ndihmon në rritjen e vetëvlerësimit dhe ndihmon në ndërtimin e identiteteve pozitive – elementë thelbësorë për përballimin e sfidave të jetës.
Departamentet e shëndetësisë dhe këshillat e arteve në të gjithë Evropën tashmë janë në kërkim të provave cilësore që tregojnë se cilat lloje të artit mund të përdoren për rezultate të ndryshme mjekësore./AP/Katror.info
Përgatiti:
