Shkencëtarët kanë krijuar simulimin e parë ndonjëherë që modelon secilën prej rreth 100 miliardë yjeve të Rrugës së Qumështit, duke përdorur inteligjencën artificiale për të kryer llogaritje galaktike 100 herë më shpejt se metodat e deritanishme.
Ky simulim revolucionar u jep studiuesve një pamje më të detajuar se kurrë të mënyrës se si galaktika jonë formohet dhe zhvillohet. Duke gjurmuar evolucionin e yjeve përgjatë 10 mijë viteve, modeli arrin një rezolucion që astrofizikanët e kanë synuar për dekada, shkruan Euronews, transmeton Katror.info.
Deri sot, simulimet më të avancuara i gruponin yjet në njësi të mëdha, duke humbur kështu fizikën fine që përcakton rritjen dhe ndryshimin e galaktikave. Metoda e re e zhvendos plotësisht këtë qasje. Duke kombinuar deep learning me modelimin tradicional fizik, ekipi arriti të gjenerojë një simulim në shkallë galaktike shumë më të shpejtë dhe me saktësi të paprecedentë.
Mundesh me e lexu edhe...
Rezultati? Një model i plotë i Rrugës së Qumështit, me rezolucion në nivel yjor individual, që realizon atë që dikur dukej e pamundur. Tani, 1 milion vjet evolucion galaktik simulohet për vetëm 2.78 orë, që do të thotë se 1 miliard vjet do të kërkonin rreth 115 ditë, krahasuar me 36 vite që duhej më parë.
Një mjet i ri për zbulim shkencor
Ky përparim nuk kufizohet vetëm në astronomi. Studiuesit theksojnë se metoda e re hibride AI–fizikë mund të zbatohet edhe në:
• simulime të strukturës së universit në shkallë të madhe
• modelimin e akrecionit të vrimave të zeza
• parashikimin e motit dhe klimës
• studimin e turbulencave
Kombinimi i inteligjencës artificiale me kompjuterët me performancë të lartë shihet si një pikë kthese në mënyrën se si trajtohen problemet komplekse me shumë shkallë dhe shumë procese fizike.
“Ky arritje tregon se simulimet e përshpejtuara nga AI nuk janë vetëm mjete njohje modelesh, por mund të bëhen mjete të vërteta për zbulime shkencore”, tha Hirashima, autori kryesor i studimit. “Ato mund të na ndihmojnë të kuptojmë se si u formuan elementet që krijuan vetë jetën në galaktikën tonë.”
Hapi i radhës për ekipin është zgjerimi i teknikës dhe eksplorimi i aplikimeve të saj në modelimin e sistemeve të Tokës. /Katror.info
Burimi: Euronews
Përktheu dhe përshtati: Katror.info
