Shkolla “Zenel Hajdini” në lagjen Kodra e Trimave është rihapur pas renovimit, duke u bërë shkolla e tretë në këtë zonë dhe e 12-ta në kryeqytet që kalon në mësim tërëditor, raporton Ekonomia Online.
Kryetari i Prishtinës, Përparim Rama, tha se synimi është që brenda katër viteve të gjitha shkollat e kryeqytetit të funksionojnë me këtë model.
“Ka pasur renovime në shumë pjesë të shkollës ‘Zenel Hajdini’. Tash është me mësim tetëorësh. Është shkolla e tretë në lagjen e Kodrës së Trimave me mësim tërëditor dhe shkolla e 12-të në kryeqytet. Ne synojmë që në katër vitet e ardhshme t’i kemi të gjitha shkollat me mësim tërëditor. Kjo është një ndihmesë e madhe për të gjitha familjet, si në aspektin ekonomik, ashtu edhe në atë të stresit. Duke i dërguar fëmijët këtu që nga ora 07:45 deri në orën 16:00, është duke u rregulluar edhe kuzhina, në mënyrë që fëmijët të kenë ushqim në këtë shkollë, sikurse në të gjitha shkollat e tjera. Sa i përket aspektit të digjitalizimit dhe kurrikulave digjitale, është në proces vendosja e paneleve në secilën klasë,” tha Rama.
Mundesh me e lexu edhe…
Ai shtoi se ende ka punë për t’u kryer në hapësirat e jashtme të shkollës, por ekipi është duke punuar për t’i finalizuar ato.
“Këtu ende po shoh se nevojiten edhe disa punë në hapësirat e jashtme, të cilat janë ende të papërfunduara, por ekipet janë duke punuar në këto çështje,” tha ai./EO/Katror.info
