Erën e ushqimit e nuhasin larg. Luna dhe shokët e shoqet e saj kanë një dashuri të veçantë për Artan Ismajlin. Kur ai arrin në parkun e qytetit në Ferizaj, fillon t’i ushqejë një nga një, shkruan KOHA.
Konfleksa, gullash dhe sallame të ndryshme janë ushqimet që Artani sjell për t’i ushqyer qentë endacakë.
Përveç kësaj, së fundmi ai, së bashku me disa vullnetarë dhe dashamirës të kafshëve, ka ndërtuar një strehimore.
Mundesh me e lexu edhe...
Në këtë mënyrë, këta qen do të kenë një strehë gjatë netëve të ftohta të dimrit dhe nuk do të kalojnë natën në rrugë.
Çdo person ka kontribuar me 184 euro për ndërtimin e strehimores, e cila mund të akomodojë deri në 25 qen.
Ismajli thotë se për këtë gjë janë ndihmuar edhe nga aktivistë të kafshëve nga Italia.
“Kjo iniciativë ka qenë një ide e kamotshme, mirëpo tash kohëve të fundit kemi pasur mundësinë që ta realizojmë. Dua t’i falënderoj të gjithë vullnetarët dhe donatorët nga Italia që e kanë bërë të mundur duke i ndarë disa të holla. Kjo iniciativë ka ardhur për shkak të nevojës së madhe që kemi pasur, për arsye se edhe këta qen sikurse edhe të tjerët nëpër Kosovë flenë në rrugë, nëpër shi, borë dhe acar. Kësisoj ne kemi vendosur të gjithë së bashku që të ndërtojmë një strehimore të vogël, ku këta qenë do ta kalojnë dimrin këtu, derisa të bëhet një zgjidhje afatgjate”, thotë ai. “Nuk mundem me e ditë numrin e qenve nëpër të gjitha pikat që i ushqejmë sepse numri i tyre ndryshon, disa rrinë në territorin e tyre e disa të tjerë i sjellin. Nuk është vetëm këtu , është edhe ne Nerodime e Lloshkobare që ne i kemi vendosur disa kolibe për ta dhe që munden me u strehu, që të kenë sadopak rehati dhe ta kenë ngrohtë”, shton Ismajli.
Përveç se i ushqen, Artani, së bashku me shokun e tij Mexhidin, edhe i mjekon qentë dhe të gjitha kafshët e tjera të pyllit që kanë nevojë.
Këtë angazhim, Ismajli tashmë e ka shndërruar në një traditë, pasi ka 20 vjet që merret me kujdesin ndaj kafshëve.
“Janë bërë më shumë se 20 vjet që ne merremi me vullnetarizëm, së bashku me shokë dhe shoqe kemi pasur raste më të ndryshmet. Në fillimin tonë ka qenë vështirë sepse edukata dhe kultura e njerëzve ka qenë minimale. Tash ka një qytetari më të madhe kjo vërehet përmes kujdesit që njerëzit e kanë me kafshët, ndaj ushqimit të tyre, mandej edhe sjelljet e kafshëve që kanë ndaj neve, të dashura dhe të sjellshme, të buta sepse në çdo kohë të falin dashuri”, tregon ai.
Ismajli thotë se paratë për ushqimin e qenve të rrugës i nxjerr nga xhepi i tij, pasi nuk ka donacione të mirëfillta për këtë qëllim.
“Donacione ne kemi shumë pak dhe kërkoj të tilla sidomos me ushqim dhe me preparate për luftimin e parazitëve të brendshëm dhe të jashtëm. Ushqimin e sigurojmë ne vetë kohë pas kohë na ndihmojnë donatorët, por që ndihma e tyre është e vogël. Kohën e fundit na ndihmon me një sasi modeste të ushqimit një shoqatë nga Holanda, gjë që e falënderoj shumë. I ftojmë edhe të tjerat, kjo zonë ka ushqim zona të tjera kanë më pak dhe qenë pastaj bëhen më agresiv. Ushqimin e sigurojmë së bashku me vullnetarë, mirëpo ne e kemi një pasion një dashuri dhe një lloj altruizmi që i jemi mësua që të mos konsumojmë ushqim vetëm për vete por ta ndajmë edhe me të tjerët, ne nuk shpenzohemi nëse e bëjmë këtë gjë, por vetëm pasurohemi. Kjo është kënaqësi e jona”, thekson ai.
Përveç vullnetarëve, edhe Komuna e Ferizajt ka shpërndarë pika ushqyese për qentë endacakë, dhe shumë shpejt do t’i ndihmojë edhe vullnetarët në kauzën e tyre për mirëqenien e kafshëve të rrugës.
“Ne jemi në kontakt me komunën dhe ajo është duke e shqyrtuar mundësinë që të na ndihmojë. Ata janë shumë serioz në këtë aspekt. Këtu ka edhe pika ushqyese të komunës, që vetë komuna i ushqen qentë e këtyre zonave”./Katror.info
Përgatiti:
