Artistja shqiptare Shqipe Ajeti Rexhepi po përfaqëson denjësisht artin bashkëkohor shqiptar në ekspozitën kolektive “Arrivals and Departures”, e cila është hapur në Galerinë Kookos në Helsinki të Finlandës. E kuruar nga Mari Blomroos-Heininen, kjo ekspozitë sjell së bashku një grup të gjerë artistësh ndërkombëtarë, duke eksploruar temat e lëvizjes, transformimit dhe kalimit përmes kohës dhe hapësirës.
Ajeti Rexhepi merr pjesë me dy vepra të saj: “Unheard Voice” dhe “In Between”, të cilat trajtojnë në mënyrë poetike dhe vizuale ndjesitë e zhvendosjes, ndryshimit dhe tranzicionit, si pjesë e përjetimeve personale dhe kolektive.
Në njoftimin e ekspozitës thuhet: “Jeta është një lëvizje në ndryshim të vazhdueshëm. Materialja dhe jomaterialja janë në lëvizjen e kohës dhe hapësirës, duke ndryshuar thelbin e tyre dhe duke krijuar variacione të pafundme. Ajo që largohet nuk kthehet kurrë plotësisht e njëjtë ose në të njëjtin vend. Diçka ka ndryshuar dhe ndryshimi po ndryshon gjithashtu. Ne mbërrijmë dhe ikim përsëri e përsëri.”
Mundesh me e lexu edhe…
Ekspozita do të qëndrojë e hapur deri më 26 korrik 2025 dhe mund të vizitohet çdo ditë nga ora 13:00 deri në 18:00. Pjesëmarrja e Shqipe Ajeti Rexhepit në këtë ngjarje është një dëshmi e përkushtimit të saj ndaj artit bashkëkohor dhe një promovim i rëndësishëm i kulturës shqiptare në skenën ndërkombëtare të artit.
