Shqipëria po njeh rritje të dukshme në transportin ajror dhe atë detar gjatë tremujorit të dytë të vitit 2025, sipas të dhënave të publikuara nga Instituti i Statistikave (Instat).
Numri i pasagjerëve që kanë udhëtuar me linja ajrore dhe përmes porteve detare ka shënuar një rritje të konsiderueshme krahasuar me të njëjtën periudhë të vitit të kaluar – një tregues i ringjalljes së lëvizshmërisë dhe tregtisë.
Në transportin ajror, janë shënuar 3 milionë e 52 mijë e 511 pasagjerë, me një rritje prej 6,0 për qind krahasuar me tremujorin e dytë të vitit 2024.
Mundesh me e lexu edhe…
Me 29 kompani që operojnë – vetëm njëra prej tyre shqiptare – hapësira ajrore e vendit ka përballuar mbi 110 mijë fluturime, ku 83,2 për qind janë fluturime tranzit (mbikalime).
Edhe volumi i mallrave të transportuara nëpërmjet ajrit ka njohur rritje të ndjeshme prej 42,4 për qind, duke arritur në 798,6 tonë. Prej tyre, 67,5 për qind ishin mallra të importuara.
Transporti detar mbetet dominues për mallrat: vetëm nga Porti i Durrësit, janë transportuar 2 mijë e 63 mijë tonë, ose 93,6 për qind e të gjithë mallrave të lëvizur me det në Shqipëri. Krahasuar me një vit më parë, porti kryesor i vendit ka pasur rritje 1,4 për qind në volum mallrash.
Numri i anijeve të hyra dhe të dala në portet shqiptare është rritur me 10 për qind, për një total prej 276 anijesh – ndër to, 253 të huaja.
Porti i Sarandës ka dalë në krye për lëvizjen e pasagjerëve në transportin detar, duke përbërë 54 për qind të totalit, ndjekur nga Durrësi me 40,3 për qind dhe Vlora me vetëm 5,7 për qind. Në total, 330 mijë e 630 pasagjerë kanë përdorur portet detare në këtë periudhë./AP/Katror.info
