Të dhënat e fundit të INSTAT tregojnë një rritje të konsiderueshme të udhëtimeve nga Shqipëria gjatë vitit 2024, me fluksin dalës që është rritur me 14% krahasuar me vitin 2023. Gjatë vitit të kaluar, numri i daljeve ka arritur në 7.9 milion, nga 6.9 milion që ishte një vit më parë. Sipas ekspertëve të industrisë, pjesa më e madhe e këtyre udhëtimeve janë të motivuara nga arsye turistike.
Rrahman Kasa, përfaqësues i Unionit Turistik Shqiptar, shprehet se rritja e fluksit turistik është një fenomen i dukshëm, sidomos gjatë sezonit veror dhe festave të fundvitit. “Fluksi i madh gjatë këtyre periudhave ka ndikuar shumë në numrin e udhëtarëve që kanë zgjedhur turizmin jashtë vendit,” thotë ai.
Ndërkohë, Aneo Hila, tur operator, thekson se ulja e kostos së udhëtimit ka qenë një faktor tjetër që ka nxitur këtë rritje. “Destinacionet kryesore për shqiptarët mbeten Italia, Greqia, Turqia dhe Spanja, dhe nuk flasim vetëm për pushime të gjata, por edhe për udhëtime të shkurtra, si ato për shopping,” shpjegon Hila.
Mundesh me e lexu edhe...
Për të tërhequr shqiptarët që udhëtojnë jashtë vendit, sidomos gjatë verës, ekspertët rekomandojnë kujdes në çmime dhe strategji të drejta marketingu. Sipas Kasa, disa destinacione në jug të Shqipërisë kanë çmime të larta që mund të ndikojnë negativisht në atraktivitetin e turizmit. Nga ana tjetër, Hila thekson rëndësinë e prenotimeve të hershme dhe zgjedhjes së ofertave më të mira.
Në krahasim me shqiptarët që kanë udhëtuar jashtë, ka një diferencë të madhe në numrin e të huajve që kanë hyrë në Shqipëri, me rreth 4 milion më shumë hyrje gjatë vitit 2024./Katror.info
Përgatiti:
