Komuniteti Politik Europian, një nismë e propozuar fillimisht nga Presidenti francez Emmanuel Macron më 9 maj 2022 gjatë një fjalimi në Parlamentin Europian, po forcon gjithnjë e më shumë rolin e tij si një platformë strategjike për dialog dhe bashkëpunim ndërmjet vendeve të kontinentit evropian, brenda dhe jashtë Bashkimit Europian, shkruan Katror.info.
Ideja, e cila u mbështet më vonë nga ish-kancelari gjerman Olaf Scholz gjatë një samiti në Pragë në shtator të po atij viti, synon krijimin e një forumi ku liderët politikë europianë mund të mblidhen rregullisht për të trajtuar sfida të përbashkëta si siguria, energjia, klima dhe konektiviteti. Scholz e bëri të qartë se Gjermania e mbështet këtë nismë si një mekanizëm plotësues dhe jo si një alternativë ndaj zgjerimit të BE-së.
Komuniteti Politik Europian zhvillon takime dy herë në vit, duke u alternuar mes një vendi anëtar të BE-së dhe një vendi jo-anëtar. Samiti i parë u mbajt më 6 tetor 2022 në Pragë, ndërsa samiti i fundit u zhvillua në nëntor të vitit të kaluar në Hungari.
Mundesh me e lexu edhe…
Qëllimi i kësaj platforme është të fuqizojë koordinimin politik në nivel kontinental dhe të ndërtojë ura bashkëpunimi për të përballuar sfidat e përbashkëta që tejkalojnë kufijtë e BE-së. Përmes këtij formati të ri, liderët europianë kanë mundësinë të ndërveprojnë drejtpërdrejt për çështje kyçe që ndikojnë të gjithë kontinentin.
Pritet që takimi i radhës të ofrojë një tjetër mundësi për thellimin e bashkëpunimit mes vendeve europiane në një kontekst të ndërlikuar gjeopolitik dhe ekonomik./Katror.info
