Oferta “një herë në vit” shpesh nuk janë aq të rralla sa duken – ja si të identifikoni zbritjet e vërteta dhe të shmangni mashtrimet.
E “premtja e zezë” është shndërruar prej kohësh në një maratonë globale konsumi, që nga SHBA deri në Mbretërinë e Bashkuar – me miliona konsumatorë që rrëzohen në grackën e ofertave agresive. Vetëm në vitin 2024, britanikët shpenzuan rreth 3.6 miliardë funta nga e premtja e zezë deri të hënën e Cyber Monday, ndonëse vendi vazhdonte të përballej me krizën e kostos së jetesës.
Por, përtej spektaklit të marketingut, ekziston një mënyrë për të përfituar prej zbritjeve pa u penduar më pas. Çelësi është të mbeteni racionalë, të filtroni ofertat dhe të kuptoni se jo çdo ulje çmimi është një mundësi reale.
Mundesh me e lexu edhe...
Pa një plan, konsumatorët bien lehtësisht pre e marketingut dhe e psikologjisë së zbritjeve, duke përfunduar me artikuj që nuk i kishin menduar fare para se të shihnin etiketën 50% ulje. Këshilla mbetet e njëjtë: nuk kurseni para nëse blini diçka që nuk ju nevojitet.
Po aq e rëndësishme është përcaktimi i një buxheti. Në kaosin e ofertave, tejkalimi i kufirit financiar ndodh brenda pak minutash. Njerëzit që ndërtojnë paraprakisht një llogaritje të të ardhurave dhe shpenzimeve e përballojnë këtë zbritje me më pak stres dhe më shumë vetëkontroll, shkruan The Guardian.
Për ata që synojnë marka specifike, rrjetet sociale janë një mjet që ia vlen të shfrytëzohet. Shumë kompani shpërndajnë kode zbritjesh, oferta të kufizuara ose njoftime të hershme vetëm për ndjekësit.
Rrjedha e njoftimeve “vetëm sot”, “stok i kufizuar” dhe “deri në 70%” krijon presion të menjëhershëm për veprim. Por çdo ulje e madhe duhet parë me dyshim. Produkte të caktuara ulen në çmim sepse ka ardhur një version i ri, janë mbiprodhuar ose nuk janë shitur dot gjatë vitit, përcjell AP.
Kontrolli i komenteve të konsumatorëve është po aq i rëndësishëm. Përtej vlerësimeve me pesë yje, vlerësimet me një ose dy yje tregojnë shpesh problemet reale: defekte të përsëritura, jetë të shkurtër përdorimi apo cilësi të dobët. Nëse ka model të qartë ankesash, zbritja nuk e justifikon rrezikun.
Jo çdo çmim i ulur është i sinqertë. Disa dyqane krahasojnë çmimin e zbritjes me një çmim të rritur artificialisht pak ditë më parë. Prandaj mjetet online si CamelCamelCamel, PriceRunner apo PriceSpy janë kthyer në aleatë të domosdoshëm. Ato tregojnë historikun real të çmimeve dhe zbulojnë nëse ulja është e vërtetë apo thjesht një iluzion marketingu.
E premtja e zezë është një fushë e hapur për mashtruesit që krijojnë faqe false me çmime joshëse. Prandaj, konsumatorëve u rekomandohet të zgjedhin dyqane të njohura, ose të paktën faqe me histori të qëndrueshme. Verifikimi i URL-së është një hap i thjeshtë që mbron të dhënat bankare.
Nga ana tjetër, kontrolli i politikës së kthimit të blerjeve është thelbësor. Në atmosferën festive të zbritjeve, shumë blerës harrojnë se disa produkte nuk kthehen nëse janë hapur ose provuar. /Katror.info
