Sonte, më 13 maj, në ora 21:00, në qytetin Bazel të Zvicrës, do të zhvillohet gjysmëfinalja e parë e edicionit të 69-të të Festivalit të Këngës në Eurovision. Evenimenti madhështor i këtij viti po mbahet në sallën “St. Jakobshalle”, ku mikpritës do të jenë Hazel Brugger, Michelle Hunziker dhe Sandra Studer, shkruan Katror.info.
Pas fitores së Zvicrës në edicionin e kaluar nga artisti Nemo me këngën “The Code” në Malmo të Suedisë, ky shtet u bë nikoqiri i konkursit më të gjatë muzikor televiziv në botë. Në këtë edicion marrin pjesë gjithsej 37 vende, përfshirë edhe Shqipërinë.
Shqipëria përfaqësohet këtë vit nga grupi “Shkodra Elektronike” me këngën “Zjerm”, dhe do të ngjitet në skenë pikërisht në natën e parë të gjysmëfinales. Grupi përbëhet nga artistët Beatriçe dhe Kola, të cilët janë pritur me entuziazëm nga publiku dhe mediat vendase.
Mundesh me e lexu edhe…
Kryeministri i Shqipërisë, Edi Rama, ka uruar sot sukses përfaqësuesve shqiptarë me një postim në rrjetet sociale: “MIRËMËNGJES, dhe duke i uruar suksese Shqipërisë sonte në Eurovision, me Beatriçen dhe Kolën nga Shkodra Elektronike, ju uroj një ditë të mbarë”.
Zvicra, si vend organizator, dhe pesë vendet e mëdha të njohura si “Big 5” – Gjermania, Franca, Italia, Spanja dhe Britania e Madhe – janë tashmë të kualifikuara për finalen e madhe që do të mbahet më 17 maj. Pjesa tjetër e vendeve do të synojnë kalimin në finale përmes dy netëve të gjysmëfinaleve.
Në këtë edicion rikthehet edhe Mali i Zi pas një mungese dyvjeçare, ndërkohë që Moldavia është tërhequr për shkak të problemeve financiare.
Spektakli i sotëm pritet me shumë emocion nga fansat e muzikës anembanë Evropës, ndërsa Shqipëria synon të sigurojë një vend të merituar në natën finale të së shtunës./Katror.info
