Kolektivi për Mendim dhe Veprim Feminist ka ftuar publikun këtë muaj në një tjetër ngjarje leximi, në kuadër të serisë “Devijimet”. Të enjten, më 31 korrik, në orën 18:30, në oborrin e Bibliotekës Kombëtare të Kosovës do të lexohet dhe diskutohet artikulli “Gratë dhe histeria në historinë e shëndetit mendor”, tashmë i përkthyer në shqip nga vetë kolektivi, shkruan Katror.info.
Artikulli, i hartuar nga Tasca, Rapetti, Carta dhe Fadda, hedh një vështrim historik mbi lindjen dhe zhvillimin e konceptit të histerisë si një “sëmundje” e lidhur kryesisht me gratë. Duke ndjekur gjenealogjinë e kësaj diagnoze nga antikiteti e deri te psikiatria moderne, autorët shqyrtojnë dy qasje dominuese që kanë ndikuar trajtimin e grave: ajo “magjiko-djallëzorologjike” dhe ajo “shkencore”.
Përmes shembujve të shumtë nga kontekste të ndryshme historike e gjeografike, teksti analizon se si histeria është përdorur si mjet kontrolli ndaj grave që janë perceptuar si devijime nga normat e gruas “së duhur”. Edhe pse si diagnozë nuk ekziston më në praktikën mjekësore moderne, format e trajtimit dhe disiplinimit të trupave femërore, sipas autorëve, vazhdojnë të mbijetojnë nën forma të tjera.
Ngjarja është e hapur për të gjithë dhe pjesëmarrja inkurajohet edhe për ata që nuk kanë arritur ta lexojnë paraprakisht tekstin. Leximi dhe diskutimi synojnë të nxisin reflektim kritik mbi mënyrën se si historia e mjekësisë ka ndikuar në kuptimin dhe trajtimin e trupit dhe mendjes së gruas, si dhe se si këto ide vijojnë të ndikojnë edhe sot./Katror.info
