Sot, më 21 mars, bota shënon Ditën Ndërkombëtare të Teatrit të Kukullave, një formë e veçantë arti që ka rrënjë të thella historike dhe është e pranishme në kultura të ndryshme anembanë globit, shkruan Katror.info.
Nga Azi e deri në Evropë, teatrot e kukullave kanë qenë një mënyrë e fuqishme e rrëfimit të historive, duke sjellë argëtim dhe reflektim për të gjitha grupmoshat.
Historia Botërore e Teatrit të Kukullave
Teatri i kukullave ka një histori mijëravjeçare, me origjinë që gjurmohet në Egjiptin e lashtë, Greqinë antike dhe Azinë Juglindore. Në Kinë dhe Japoni, kukullat janë përdorur si mjete për tregimin e legjendave dhe mësimeve morale. Në Evropën mesjetare, teatri i kukullave shpesh kishte një rol satirik, duke kritikuar politikën dhe shoqërinë në mënyrë simbolike. Një nga format më të famshme është “Punch and Judy” në Angli, e cila daton që nga shekulli i 17-të.
Mundesh me e lexu edhe…
Në shumë vende të botës, si Franca, Italia dhe Rusia, teatrot e kukullave janë të zhvilluara dhe të mbështetura nga institucionet shtetërore, duke i konsideruar si pjesë të rëndësishme të trashëgimisë kulturore.
Teatri i Kukullave në Kosovë – “Dodona”
Në Kosovë, i vetmi teatër i kukullave është Teatri “Dodona” në Prishtinë. Ky institucion ka një histori prej më shumë se tre dekadash dhe vazhdon të sjellë shfaqje të dedikuara kryesisht për fëmijë.
Themeluar më 12 nëntor 1986, “Dodona” nisi punën më 16 maj 1987 me premierën e parë, “Pylli është i të gjithëve”. Që nga ajo kohë, ai është kthyer në një hapësirë të rëndësishme për artin e kukullave dhe teatrin për të rinjtë. Megjithatë, në Kosovë ekziston një perceptim i gabuar se teatri i kukullave është vetëm për fëmijët, ndërkohë që në vende të tjera, kjo formë arti është shumë e vizituar edhe nga të rriturit.
Pavarësisht sfidave, “Dodona” mbetet një qendër e rëndësishme kulturore në Prishtinë, duke ofruar jo vetëm shfaqje artistike për të vegjlit, por edhe një platformë për të ruajtur dhe zhvilluar këtë traditë të veçantë./Katror.info.
Përgatiti:
