Qytetarët e Kosovës janë ftuar që sot t’i bashkohen një bojkoti të gjithëpërfshirë të marketeve, si përgjigje ndaj çmimeve të larta të produkteve ushqimore dhe esenciale.
Ky veprim vjen si pjesë e një nisme rajonale që ka nisur në Kroaci dhe tani ka mbështetje të madhe në Kosovë, ku grupi “Kosova Bojkoton” numëron mbi 6.300 anëtarë.
Aktivistët kërkojnë që për një ditë, qytetarët të bojkotojnë blerjet, si një mesazh të fuqishëm ndaj tregtarëve dhe autoriteteve se konsumatorët nuk do të pranojnë më çmime të padrejta.
Mundesh me e lexu edhe…
Kosovarët kanë përjetuar një rritje të ndjeshme të çmimeve për katër vitet e fundit, veçanërisht për produktet bazë, ndërsa pagat kanë mbetur thuajse të pandryshuara.
Bojkoti synon të mbrojë interesat e konsumatorëve dhe të krijojë një sistem ekonomik më të drejtë dhe të qëndrueshëm.
Grupi ka theksuar se kjo lëvizje nuk është kundër bizneseve lokale, por një përpjekje për të arritur ulje të çmimeve. “Nuk do të pranojmë të paguajmë më shumë. Bojkotojmë gjithçka, përveç produkteve minimale,” deklaron grupi.
Pas suksesit të bojkotit në Kroaci, ku qeveria reagoi me masa të reja për uljen e çmimeve, ky bojkot pritet të ketë ndikim edhe në Kosovë dhe rajon, duke përfshirë Bosnjën dhe Hercegovinën, Maqedoninë e Veriut dhe më gjerë./Katror.info
