Seanca konstituive e Kuvendit të Kosovës do të mbahet sot në orën 17:00, pas një ndryshimi të orarit të paralajmëruar më herët.
Presidentja e Kosovës, Vjosa Osmani, kishte njoftuar të martën se seanca do të thirrej në orën 12:00. Megjithatë, kryetari i Kuvendit, Dimal Basha, bëri të ditur se, me kërkesë të nënkryetares së PDK-së, Vlora Çitaku, nisja e saj është shtyrë për pasdite.
Sipas Bashës, kërkesa për ndryshimin e orarit erdhi për shkak të zhvillimeve në Gjykatën Speciale në Hagë, ku gjatë ditës pritet të paraqitet mbrojtja në procesin gjyqësor ndaj ish-krerëve të UÇK-së. Ai theksoi se, në shenjë respekti për këtë proces, subjektet politike janë pajtuar që seanca të nisë në orën 17:00, për të vijuar më pas me votimin e qeverisë.
Mundesh me e lexu edhe...
Thirrja e seancës konstituive erdhi një ditë pasi Komisioni Qendror i Zgjedhjeve certifikoi rezultatet e zgjedhjeve parlamentare të 28 dhjetorit.
Në këto zgjedhje, Lëvizja Vetëvendosje doli forca e parë me mbi 51 për qind të votave, duke siguruar 57 ulëse në Kuvend. Partia Demokratike e Kosovës fitoi 22 mandate, Lidhja Demokratike e Kosovës 15, ndërsa Aleanca për Ardhmërinë e Kosovës 6. Njëzet ulëse të tjera u takojnë përfaqësuesve të komuniteteve joshumicë.
Zgjedhjet e mëparshme nuk kishin prodhuar një shumicë parlamentare, duke lënë vendin pa institucione të reja që nga 9 shkurti dhe duke e futur Kosovën në një ngërç institucional. Si pasojë, Kuvendi ende nuk ka miratuar buxhetin për vitin 2026 dhe as disa marrëveshje ndërkombëtare me vlerë të konsiderueshme.
Ndërkohë, legjislativi ka edhe një afat të rëndësishëm përpara: zgjedhjen e presidentit të ri deri më 4 mars, një muaj para përfundimit të mandatit të Vjosa Osmanit. /Katror.info
