Një nga operatorët kryesorë hekurudhorë në Japoni po ndërmerr një projekt inovativ për të ndërtuar stacionin e parë hekurudhor në botë të printuar në 3D.
Stacioni i ri, me një sipërfaqe prej rreth 10 metra katrorë, do të ndërtohet në prefekturën jugore Wakayama, rreth 100 kilometra në jug të Osakës, qytetit të tretë më të madh në Japoni, sipas njoftimit të kompanisë West Japan Railway (JR West), shkruan CNN, transmeton Katror.info
Ai do të zëvendësojë një strukturë të vjetër prej druri që prej kohësh ka shërbyer si strehë për pasagjerët në stacionin Hatsushima.
Mundesh me e lexu edhe…
Një model i krijuar me kompjuter paraqet një ndërtesë minimaliste të bardhë me një çati të lakuar dhe një detaj dekorativ në fasadë – një prerje mandarine, frut që kultivohet në këtë zonë.
Stacioni – ose eki, siç njihet në japonisht – është një pikë hyrëse drejt ishullit të pabanuar Jinoshima, ku banorët shkojnë për not apo kamping
Ndërkohë, qyteti i afërt Arida është i njohur për portet e tij të peshkimit dhe për peizazhin e tij malor të mbushur me plantacione portokalli.
”Komponentët strukturorë do të paraprodhohen duke përdorur teknologjinë e printimit 3D, përpara se të transportohen në vendin e ndërtimit, ku punëtorët pritet t’i montojnë brenda gjashtë orësh”, tha JR West.
Puna do të fillojë pas udhëtimit të fundit të trenit më 25 mars, sipas mediave lokale.
Në projekt është e përfshirë edhe kompania ndërtimore Serendix, e njohur për ndërtimin e shtëpive futuristike me teknologjinë e printimit 3D.
Nuk është menjëherë e qartë pse pikërisht stacioni më pak i njohur i Hatsushimës u zgjodh për të pritur këtë risi, por JR West tha se projekti do t’u japë atyre dhe kompanive të tjera të transportit në Japoni një mundësi për të eksploruar “materiale ndërtimi të qëndrueshme dhe teknologji të avancuara” për rajone të tjera në të ardhmen.
Japonia po përballet me një tkurrje të fuqisë punëtore për shkak të plakjes së popullsisë. Sipas të dhënave zyrtare, mbi 40% e popullsisë do të jetë mbi 65 vjeç deri në vitin 2070.
“Me Japoninë që po përballet me një fuqi punëtore në rënie dhe në plakje, prezantimi i teknologjive inovative si printimi 3D do të ndihmojë në modernizimin e planifikimit të infrastrukturës hekurudhore,” shtoi JR West./Katror.info
Përgatiti:
