Nga një nisje modeste gjashtë vite më parë, një fermë në fshatin Korishë të Prizrenit është shndërruar në një model suksesi për zhvillimin rural dhe bujqësinë moderne në Kosovë. Kompania ka arritur të ndërtojë një nga fermat më të mëdha dhe më të teknologjizuara të shpezëve brojlerë në vend, duke përmbushur standardet për eksport drejt Bashkimit Evropian.
Drejtori gjeneral i kompanisë, Naim Ukaj, tregoi për RTK se investimi që ka kaluar shifrën prej 3 milionë eurosh është bërë në bashkëpunim me një bashkatdhetar nga Zvicra. Ferma përfshin një sipërfaqe prej tre hektarësh dhe aktualisht rrit rreth 100 mijë zogj brojlerë në muaj, me qëllim që ky numër të dyfishohet deri në fund të vitit.
Teknologji evropiane, mbrojtje natyrale
Ferma funksionon sipas standardeve më të larta të BE-së, ku rritja e zogjve bëhet pa përdorim antibiotikësh apo steroidesh, falë një sistemi të avancuar të kontrollit të temperaturës, ndriçimit, ushqimit dhe ujit. Siç theksoi Ukaj, ky model i rritjes eliminon nevojën për ndërhyrje mjekësore dhe siguron kushte ideale për shëndetin e shpezëve.
Mundesh me e lexu edhe...
Një tjetër element i rëndësishëm është organizimi i brendshëm i fermës, ku punëtorët nuk lejohet të kalojnë nga një objekt në tjetrin gjatë ciklit të rritjes – një masë shtesë për të ruajtur pastërtinë dhe bio-sigurinë.
Ferma posedon gjithashtu një thertore moderne, ku realizohen deri në 4,000 therje në ditë sipas metodës “hallall”. Procesi përfshin ftohjen, pastrimin dhe paketimin automatik të mishit, duke garantuar standard të lartë higjiene dhe cilësie.
Vlerësim për punonjësit dhe mbështetje institucionale
Aktualisht, kompania punëson 36 persona, me një pagë minimale neto prej 450 eurosh, duke kontribuar jo vetëm në ekonominë vendore, por edhe në krijimin e vendeve të qëndrueshme të punës. Ferma ka përfituar gjithashtu grant nga Ministria e Bujqësisë për mbarështimin e pulave vojse, si pjesë e sistemit gjysmë të lirë të rritjes.
Me një çmim konkurrues dhe standarde të pakrahasueshme në rajon, kjo fermë në Korishë përfaqëson një histori frymëzuese të agrobiznesit kosovar. Gjatë intervistës për RTK, Ukaj theksoi përkushtimin për rritje të qëndrueshme dhe vizionin për ta çuar këtë model përpara – jo vetëm për tregun vendas, por edhe atë ndërkombëtar./Katror.info
