Publicisti Veton Surroi ka vlerësuar se pjesëmarrja në zgjedhjet lokale të mbajtura më 12 tetor në Kosovë dëshmon një nivel të lartë mobilizimi demokratik, të krahasueshëm me vendet e Skandinavisë dhe Beneluksit.
Në një reagim publik, Surroi ka përmendur se në këto zgjedhje kanë votuar rreth 812 mijë qytetarë, ndërsa sipas të dhënave të regjistrimit të popullsisë të vitit 2024, Kosova ka 1.6 milionë banorë rezidentë, nga të cilët llogariten rreth 1.17 milionë votues të mundshëm.
“Kjo do të thotë se pjesëmarrja reale në zgjedhje arrin në 70 për qind, një nivel që e vendos Kosovën në rangun e mobilizimit që për zgjedhje vendore e kanë tradicionalisht shtetet skandinave dhe ato të Beneluksit,” ka shkruar ai.
Mundesh me e lexu edhe...
Surroi ka vërejtur se ky mobilizim demokratik i qytetarëve është kontrastuar me një “mobilizim tjetërfare” në disa studio televizive, ku – sipas tij – analistët interpretonin rezultatet zgjedhore mbi të dhëna të paqena, duke krijuar një hendek mes realitetit të debateve dhe vullnetit të vërtetë demokratik të qytetarëve.
Ai ka theksuar se rezultatet preliminare dëshmojnë një shtrirje pluraliste të votës në të gjithë vendin, një fenomen që – siç thotë Surroi – e afron Kosovën me demokracitë më të avancuara të Evropës dhe e distancon nga praktikat e vendeve të tjera të Ballkanit Perëndimor. /Katror.info
