Drejtuesi i Telegramit, Pavel Durov, ka njoftuar se mjetet e inteligjencës artificiale të zhvilluara nga xAI, kompania e Elon Musk, do të integrohen në shërbimin e mesazheve të koduara, Telegram.
Sipas BBC-së, duke shpallur marrëveshjen, Durov, ka thënë se kjo do ta bëjë firmën e tij të shpërndajë asistentin e Inteligjencës Artificiale, Grok, për mbi një miliard përdorues të Telegramit.
Sipas Durov, marrëveshja – e cila do të zgjasë për një vit – do t’i sjellë Telegramit 300 milionë dollarë në para dhe aksione nga xAI, si dhe 50% të të ardhurave nga abonimet e xAI të shitura përmes Telegramit.
Mundesh me e lexu edhe…
“Së bashku, fitojmë!”, ka shkruar ai në rrjetet sociale.
Zhvillimi vjen pas vendimit të kompanisë Meta që të përfshijë një shërbim të ngjashëm të Inteligjencës Artificiale në platformën e mesazheve, WhatsApp.
Ndërkohë, analistja e medias, Hanna Kahlert ka thënë për BBC-në se ky hap ndjek modelin e “bashkimit të rrjeteve sociale me inteligjencën artificiale”. Megjithatë, ajo ka theksuar se kjo nuk është domosdoshmërisht ajo që përdoruesit kërkojnë.
“Përdoruesit ende përdorin platformat sociale kryesisht për të biseduar me miqtë dhe për të parë përditësimet e tyre. Shtimi i AI-së në mesazhet direkte i zëvendëson këto ndërveprime – zvogëlon besimin mes përdoruesve dhe largon vëmendjen nga vlera unike e platformës,” ka thënë ajo.
Kujtojmë se Elon Musk ka një gamë jashtëzakonisht të gjerë interesash teknologjike, që variojnë nga start-up-i për implantet në tru, Neuralink, deri tek kompania e tij për ndërtimin e raketave, SpaceX.
Ai gjithashtu ka një rol të rëndësishëm në administratën e presidentit amerikan Donald Trump dhe ka bërë fushatë të fuqishme për rizgjedhjen e tij. Njeriu më i pasur në botë gjithashtu ka investuar shumë fushën e inteligjencës artificiale. /Katror.info
Përgatiti:
