Në epokën e ndërrimit të shpejtë të modës, ku veshjet blihen për tu përdorur dhe hedhur brenda një periudhe të shkurtër, me siguri e keni gjetur veten në telashe se ku t’i lini apo dhuroni ato.
Për këtë ka një zgjidhje të mirë ku mbi të gjitha mund ta promovoni ndjenjën e solidaritetit dhe kujdesit për njëri-tjetrin.
“Tesha Vesha”, dyqani me dy lokacione në Prishtinë, është dyqan bamirësie në kuadër të oranizatës Aksioni për Nëna dhe Fëmijë (AMC), organizatë kjo e cila synon përmirësimin e shëndetit të nënave dhe fëmijëve.
Hadise Kadiri, menaxhere e dyqanit “Tesha Vesha”, në intervistë për Katrorin na tregoi rreth qëllimit të organizatës dhe funksionimit të saj.
Mundesh me e lexu edhe…
“Tesha Vesha është dyqan bamirësie në kuadër të oranizatës AMC, Aksioni për Nëna dhe Fëmijë. Ideja e themelimit të Tesha Veshës është që me kriju një qendër, ku qytetarët munden me dhuru rroba si donacion, dhe pastaj me organizu shitjen e tyre, dhe me fonde të mbledhura përmes Tesha Veshës, me i implementu programet e kësaj organizate. Organizata AMC është OJQ që funksionon në Kosovë tash e 11 vite, dhe qëllimi i kësaj organizate është shpëtimi dhe përmirësimi i nënave dhe fëmijëve në Republikën e Kosovës.”
“Kjo organizatë implementon programe të ndryshme, me fokus tek shëndeti i nënave dhe shëndeti i fëmijëve. Programet janë të ndryshme, disa prej tyre janë furnizimi i qendrave të mjekësive familjare, si dhe QKUK-së dhe repartit të Gjinekologjisë me medikamente të nevojshme, me aparatura të nevojshme dhe në të njëjtën kohë mbajtjen e trajnimeve lidhur me shëndetin e nënave dhe fëmijëve, tek periudha e shtatëzanisë, por në të njëjtën kohë edhe ato të mëtutjeshme”, shprehet ajo.
Që prej themelimit të saj, tash e 8 vite, Tesha Vesha ka funksionuar qëndrueshëm me anë të aktit të vullnetarizmit nga ana e qytetarëve, të cilët dhurojnë për kauzën humanitare.
“Në “Tesha Veshë”, kohëve të fundit kemi pa një fluks të madh të njerëzve të cilët kanë pasë dëshirë me shpreh anën vullnetare të tyre, qoftë prej të rinjve të cilët kanë pas dëshirë me bo punë vullnetare edhe me kontribu në Tesha Veshë, përmes aftësive të tyre, por në të njëjtën kohë po e potencojmë edhe pjesën e vullnetarizmit që është edhe dhurimi i rrobave të cilat bëhen në Tesha Veshë, donatorët të cilët dhurojnë në Tesha Veshë, janë mbështetësit më kryesor të funksionimit të Tesha Veshës, donatorë këta që shumica janë qytetarë të Republikës së Kosovës, sidomos nga Prishtina, por kemi edhe interesim prej vendeve të ndryshme, që me dhuru në Tesha Veshë.”
“Andaj po e theksojmë që është një gjest human edhe një vullnetarizëm që me ndihmu në komunitet edhe me ndihmu në shoqëri me atë pak mundësi që ata kanë. Edhe fytyra publike, kanë ndihmu në misionin e Tesha Veshës, mundemi me potencu Agnesa Vuthaj që vazhdimisht ka qenë njëra prej kontribuueseve kryesor të Tesha Veshës e cilat ende edhe sot e kësaj dite dhuron, por mbështetje kemi pasur edhe prej bizneseve të ndryshme, gjithashtu Albi Malli ka dhuru rroba si donacion, disa herë, gjatë krejt këtyre viteve të punës së Tesha Veshës”, thotë ajo.
E ky dyqan nuk është vetëm vend dhurim për rrobat, por edhe mundësi e mirë për të blera gjëra unike dhe me çmim të volitshëm.
“Tesha Vesha niset me slloganin dhuro me zemër, blej me dashni. Në qoftë se e gjeni veten që nuk po keni hapësirë, ku me i dhuru rrobat, ose diçka, Tesha Vesha është këtu që me i pranu rrobat edhe pastaj këto rroba me u përdor për kauza bamirësie, andaj kushdo që dëshiron me shpreh anën e vullnetarizmit, jeni më se të mirëseardhur, jo vetëm për donacion, por në të njëjtën kohë edhe për blerje, sepse duhet potencuar fakti që gjërat që dhurohen në Tesha Veshë janë gjëra goxha unike edhe janë gjëra që jo shpesh mundesh me i gjet në treg, edhe çmimet janë më se të volitshme për tregun, pra është një benefit i dyanshëm” shton ajo.
Brenda vitit ky dyqan riciklon mbi 35 mijë kilogram rroba, dhe shuma që mblidhet në fund të vitit është zakonisht mbi 30 mijë euro, të cilat dërgohen në organizatën AMC, ndërsa ajo që dhurohet këtu nuk janë vetëm rroba.
“Donatorët ose të gjithë ata që kanë dëshirë me dhuru, munden me dhuru çkado që ata ndjehen të gatshëm me dhuru, duke filluar nga rrobat: për fëmijë, për të rritur, për meshkuj, për femra, dhe të moshave të ndryshme, munden me pru aksesorë të ndryshëm, këpucë, gjëra shtëpiake, libra, d.m.th, nuk jemi të fokusuar vetëm tek pjesa e rrobave, por kemi hapësirë që me pranu edhe gjëra të tjera në Tesha Veshë, gjithashtu kisha pas dëshirë me potencu edhe mënyrën se qysh dhurohet në Tesha Veshë” , përfundon Hadisa.
Dhurimi i rrobave ndër të tjera, ndihmon në mbrojtjen e mjedisit duke zvogëluar sasinë e mbetjeve tekstile, andaj në vend që të hidhni rrobat e vjetra, ju jepni atyre një jetë të re dhe kontribuoni në një të ardhme më të qëndrueshme për planetin tone, në një dyqan si Tesha Vesha edhe kurseni xhepin tuaj.
Andaj për të dhuruar apo blerë në Tesha Vesha, mund ta gjeni në dy lokacione në Prishtinë: tek Zahir Pjaziti, (përballë EULEX-it) dhe tek Lagjia e Muhaxherëve (rrugës për tek ambasada e Zvicrës), nga ora 09 – 18, apo të telefononi në numrin: 049 110 176.
Dhe kështu mund të kontribuoni në komunitet, në vetën tuaj dhe në ruajtjen e mjedisit. /Katror.info
Edicionin #53 të plotë e gjeni KËTU 🙂
Përgatiti:
