Kompania amerikane Tesla zyrtarisht paraqiti një kërkesë për licencë për furnizimin me energji elektrike në tregun britanik te rregullatori i energjisë Ofgem në fund të muajit të kaluar. Prodhuesi i automjeteve elektrike po përgatitet të furnizojë me energji elektrike shtëpitë dhe bizneset britanike. Nëse kërkesa e tij miratohet, ky veprim mund t’i hapë rrugën për të konkurruar me kompanitë e mëdha që dominojnë tregun britanik të energjisë që në vitin e ardhshëm. Oferta, e raportuar për herë të parë nga Sunday Telegraph, erdhi nga Tesla Energy Ventures dhe u nënshkrua nga Andrew Payne, i cili është përgjegjës për projektet energjetike të kompanisë në Evropë, përcjell TAR.
Tesla, e njohur më së miri si një nga prodhuesit kryesorë të automjeteve elektrike në botë, zhvillon gjithashtu sisteme të gjenerimit të energjisë diellore dhe produkte të ruajtjes së energjisë në bateri. Kompania e Elon Musk tashmë furnizon me energji elektrike konsumatorët në Teksas, nëpërmjet Tesla Electric. Tani po përpiqet të sigurojë leje për të furnizuar me energji elektrike familjet britanike, ndërsa përballet me një rënie të zgjatur të shitjeve në Evropë. Shifrat e publikuara javën e kaluar nga shoqata e prodhuesve të automjeteve në Mbretërinë e Bashkuar SMMT treguan se shitjet e makinave të reja ranë me pothuajse 60% muajin e kaluar në 987 automjete, nga 2,462 një vit më parë.
Ndërkohë, në Gjermani, shitjet e Tesla ranë në 1,110 automjete në korrik, 55.1% më pak se i njëjti muaj në vitin 2024. Ndërkaq, LG Energy Solution ka nënshkruar një marrëveshje prej 4.3 miliardë dollarësh për të furnizuar Tesla-n me bateri për sisteme ruajtjeje energjie (ESS) nga fabrika e saj në Michigan. Bëhet fjalë për bateri të teknologjisë LFP (litium-hekur-fosfat), të cilat nuk varen nga importet kineze, që tashmë përballen me tarifa të larta në SHBA. Kontrata do të zgjasë nga gushti 2027 deri në korrik 2030, me mundësi zgjatjeje deri në shtatë vjet. LGES është aktualisht prodhuesi i vetëm i madh i këtyre baterive në SHBA, duke përfituar nga mungesa e konkurrencës vendase. /Katror.info
Mundesh me e lexu edhe...
Përgatiti:
