Rotary Club Prishtina Ulpiana ka shënuar një moment të veçantë në historinë e saj me ndërrimin zyrtar të udhëheqjes për vitin 2025–2026. Presidenti në largim, Endrit Hasani, ia dorëzoi zyrtarisht çekanin e drejtimit themeluesit të Katror Media, Muhamet Jashanica, duke hapur kështu një kapitull të ri për klubin.
Në ceremoninë të mbajtur më 25 qershor, anëtarët e klubit shprehën mirënjohje për përkushtimin dhe udhëheqjen e Hasanit gjatë mandatit të tij, dhe uruan Jashanicën në fillimin e këtij kapitulli të ri me vizion dhe energji të reja, raporton Katror.info.
Ndërkaq, me entuziazëm dhe vizion për të ardhmen, presidenti i ri pranoi detyrën duke theksuar rëndësinë e frymës bashkëpunuese, angazhimit në projekte me ndikim dhe fuqizimit të komunitetit lokal përmes shërbimit.
Mundesh me e lexu edhe…
“Rotary është një koncept i bashkimit të ideve dhe energjive për të shërbyer dhe për të realizuar projekte që shkojnë në të mirë të komunitetit. Jam i lumtur që Bordi dhe miqtë në RCPU kanë besuar në mua me detyrën që më është dhënë – udhëheqjen e Klubit Prishtina Ulpiana për vitin rotarian 2025/26. Bashkë me sekretaren Urata, por edhe me të gjithë miqtë në organizatën tonë, do të mund të vazhdojmë shumë nisma unike që tashmë janë bërë tradicionale, si dhe të shtojmë punën e projekteve në të mirë të shoqërisë nga Klubi i Kryeqytetit,” ka deklaruar Jashanica.
Klubi njoftoi gjithashtu për emërimin e Urata Shuletës si Sekretare e re, një pozicion thelbësor për koordinimin dhe funksionimin e përditshëm të aktiviteteve të klubit.
Me udhëheqjen e re dhe një ekip të përkushtuar, Rotary Club Prishtina Ulpiana synon të vazhdojë me projekte humanitare, edukative dhe mjedisore që përmirësojnë jetën në komunitet dhe promovojnë vlerat universale të Rotary International./Katror.info
