Filmi i shkurtër “Thirrja” (The Call), me regji të Mirak Zymberajt, po përfaqëson Kosovën në një prej festivaleve më të rëndësishme ndërkombëtare për filmin e shkurtër artistik – Alexandria Short Film Festival, që mbahet në Egjipt.
Ky festival është një nga ngjarjet kualifikuese për çmimin më prestigjioz të industrisë së filmit, Oscar-in.
Lajmin e bëri të ditur regjisori Mentor Zymberaj, i cili ndau emocionin dhe krenarinë për përfshirjen e këtij filmi kosovar në mesin e veprave që garojnë në këtë event me reputacion të lartë artistik ndërkombëtar, shkruan Telegrafi.
Mundesh me e lexu edhe…
“Sonte në Festivalin Alexandria Short Film Festival – Qualification Festival for OSCAR, prezantohet filmi THIRRJA (THE CALL) në regji të Mirak Zymberaj, i cili prezanton Kosovën në këtë event artistik të rëndësishëm ndërkombëtar!” – shkroi ai në një postim në Facebook, duke nënvizuar rëndësinë e pjesëmarrjes në këtë festival të njohur në skenën botërore të filmit të shkurtër.
Në posterin zyrtar të publikuar, shihet një moment nga filmi “Thirrja”, me aktorin kryesor në një skenë emocionuese, ndërsa theksohet se bëhet fjalë për premierën e tij në rajonin MENA (Lindja e Mesme dhe Afrika e Veriut).
Pjesëmarrja e Kosovës në festivale të tilla ndërkombëtare tregon për rritjen e cilësisë dhe pranisë së filmit kosovar në tregun global të artit, si dhe për talentin në rritje të regjisorëve të rinj si Mirak Zymberaj.
Festivali i Filmit të Shkurtër në Aleksandri është në edicionin e tij të 11-të dhe konsiderohet një platformë e rëndësishme për promovimin e filmbërësve të rinj nga mbarë bota, veçanërisht atyre nga rajoni i Mesdheut./Katror.info
Përgatiti:
