Rrjeti Youth Hub për Ballkanin Perëndimor dhe Turqinë ka hapur thirrjen për propozime për të mbështetur OJQ-të lokale dhe të mesme që fokusohen tek të rinjtë, veçanërisht ata të margjinalizuar për shkak të gjinisë, statusit ekonomik, etnisë, orientimit seksual, aftësisë së kufizuar apo vendndodhjes gjeografike, shkruan Katror.info.
Ky program, pjesë e projektit “Stronger Voices for Better Choices” (Zëra më të fortë për zgjedhje më të mira), synon të rrisë pjesëmarrjen e të rinjve në jetën publike, të promovojë mundësi të barabarta për grupet e nën-përfaqësuara dhe të fuqizojë angazhimin e shoqërisë civile në nivel lokal, kombëtar dhe rajonal.
Organizatat e përzgjedhura mund të përfitojnë financim deri në 5,000 EUR, si dhe mbështetje shtesë përmes trajnimeve kombëtare dhe rajonale, mentorimit të vazhdueshëm dhe pjesëmarrjes në aktivitetet e Youth Hub.
Mundesh me e lexu edhe…
Afati për aplikim është 30 Shtator 2025, ora 16:00 (CEST), ndërsa aplikimet mund të bëhen online në këtë link: https://d4d-ks.org/en/activities/call-for-grants/
Projekti zbatohet nga Fondacioni Ana dhe Vlade Divac, në bashkëpunim me organizatat partnere: Beyond Barriers, Youth Alliance, Institute for Youth Development KULT, NVO Prima, Democracy for Development (D4D), dhe Toplum Gönüllüleri Vakfı – TOG, me mbështetjen e Bashkimit Evropian./Katror.info
