Europa dorëzon sot trofeun e saj të parë të sezonit me përballjen mes Tottenham Hotspur dhe Manchester United në finalen e Ligës së Europës, e cila zhvillohet në stadiumin “San Mamés” në Bilbao, duke nisur nga ora 21:00. Dy skuadrat angleze përballen jo vetëm për një trofe të rëndësishëm kontinental, por edhe për një vend në Ligën e Kampionëve dhe për të shpëtuar një sezon që ka qenë nën pritshmëri.
Pas një ecurie të vështirë në Premier League, ku Tottenham dhe United janë renditur përkatësisht në vendet e 16-të dhe 17-të, me një total prej 39 humbjesh së bashku, kjo finale përfaqëson një mundësi të artë për të rikthyer krenarinë dhe për të mbyllur sezonin me një buzëqeshje.
Trajneri i Tottenhamit, Ange Postecoglou, ka deklaruar me besim se “gjithmonë fiton një trofe në vitin e tij të dytë në krye të një ekipi”, ndërsa “Djajtë e Kuq” vijnë në këtë finale të pamposhtur në garën evropiane, pas një udhëtimi të mbushur me emocione gjatë fazave me eliminim direkt.
Mundesh me e lexu edhe...
Manchester United ka fituar këtë kompeticion në vitin 2017, ndërsa në vitin 2021 humbi finalen përballë Villarrealit pas gjuajtjeve nga pika e bardhë. Trajneri portugez i skuadrës së “Djajve të Kuq”, në konferencën për shtyp para ndeshjes, u shpreh se trofeu nuk do të ndryshojë krejtësisht perceptimin për sezonin, por do të ndihmojë në ndërtimin e një të ardhmeje më të fortë:
“Nuk mendoj se bëhet fjalë për një të ardhme të re për mua, por fitorja do të na ndihmonte për ta përfunduar sezonin me ndjesi pozitive. Të fitosh një titull evropian është e rëndësishme. Nuk do ta ndryshojë sezonin tonë, por do të jetë një shtysë për të ardhmen. United është një klub i madh, me tifozë të shumtë në mbarë botën. Ne duhet të jemi të fokusuar dhe të bëjmë gjërat siç duhet.”
Ai theksoi gjithashtu se skuadra ka rikuperuar disa lojtarë kyç dhe ka pasur kohë për t’u përgatitur siç duhet për këtë sfidë.
Një finale mes dy klubeve të mëdha angleze, me shumë për të fituar dhe për të humbur, premton spektakël dhe emocione për tifozët në të gjithë kontinentin. Fituesi do të ngjitet jo vetëm në majën e Ligës së Europës, por edhe në trenin elitar të futbollit europian – Ligën e Kampionëve./Katror.info
