Trajneri i ri i ekipit Chicago Fire pret shumë nga sulmuesi Xherdan Shaqiri në këtë edicion në MLS të SHBA-së. Frank Klopas e ka vlerësuar Shaqirin lojtar të veçantë. Sipas trajnerit të Chicagos, Shaqiri mund ta shtyjë ekipin drejt sukseseve. Klopas ka theksuar se cilësitë e Shaqirit do të dalin edhe më shumë në pah këtë edicion, në të cilin Chicago synon të paktën të sigurojë plasmanin në garat e plejofit.
Shaqiri u shpall lojtar i ndeshjes në fitoren e fundit të Chicagos ndaj St. Louis Cityt me rezultatin 1:0. Ai asistoi në golin e realizuar nga Rafael Czichos në fund të pjesës së parë. Për Shaqirin ishte asistimi i parë këtë edicion në shtatë ndeshje të luajtura në kampionatin amerikan, përcjell koha.net.
“Shaqiri është lojtar i veçantë. Unë e shoh si të tillë dhe gjithmonë do ta them këtë për shkak se kam besim të madh tek ai. Në ndeshjen e fundit Shaqiri pati paraqitje fantastike. Pres se do ta ketë ndikimin e madh në secilën përballje tjetër të këtij edicioni. Ai do të na ndihmojë shumë dhe do të përmirësohet edhe më shumë nga ndeshja në ndeshje”, ka thënë Klopas.
Shaqiri 31-vjeçar, është kritikuar kohët e fundit për paraqitjet e tij, por Klopas është i bindur se reprezentuesi i Zvicrës po kthehet gradualisht në formën e tij më të mirë, gjë që e dëshmoi me paraqitjen e fundit. Sipas Klopasit, me kalimin e kohës Shaqiri do të jetë i pandalshëm për skuadrat kundërshtare.
“Ai po mundohet gradualisht të gjejë ritmin dhe kjo nuk është aspak e lehtë. Por, të gjithë mund ta shohin që me lojën që po e bën po tregohet gjithnjë e më i rëndësishëm për ekipin tonë. Madje, me kalimin e ndeshjeve ai do të bëhet i pandalshëm dhe do të jetë lojtari kyç i ekipit tonë”, ka shtuar Klopas. “Me formën e mirë fizike do të jetë në gjendje edhe t’i përfundojë ndeshjet, sepse Shaqiri e ka këtë cilësi të veçantë. Po punon shumë dhe unë jam shumë i kënaqur me të. Po e shoh duke u forcuar çdo ditë e më shumë dhe nga ndeshja në ndeshje”.
Chicago Fire renditet në pjesën e poshtme të tabelës në MLS pas 11 ndeshjeve të zhvilluara. Zë vendin e 21-të me vetëm 14 pikë të mbledhura.
Shaqiri është pjesë e Chicago Fire prej fillimit të vitit të shkuar, kur iu bashkua nga skuadra e Lyonit. Ai me ekipin amerikan ka kontratë deri në fund të vitit 2024, ndërsa në Evropë ka luajtur për Liverpoolin, Stoke Cityn, Interin, Bayern Munichun e Baselin. /Katror.info
Përgatiti:
