Tri gra me origjinë nga Kosova janë nderuar në qytetin gjerman Siegen për veprimin e tyre të guximshëm gjatë një sulmi që ndodhi verën e kaluar në një autobus të mbushur me pasagjerë. Ato, bashkë me një shtetas sirian, rrezikuan jetën për të ndaluar një grua 32-vjeçare, e cila kishte plagosur me thikë gjashtë persona gjatë festivalit të qytetit.
Gjatë sulmit, njëra nga gratë kosovare kishte mbrojtur fëmijën e saj, ndërsa dy të tjerat, së bashku me burrin sirian, ndërhynë për të ndalur sulmuesen dhe për ta mposhtur, derisa mbërriti policia.
Për këtë akt të jashtëzakonshëm të guximit civil, autoritetet e distriktit të Siegenit u kanë ndarë certifikata nderi katër personave që ndërhynë. “Me veprimet e tyre, ata kanë shpëtuar jetë dhe janë bërë shembuj të vërtetë të guximit dhe solidaritetit njerëzor”, deklaroi administratori Andreas Müller, sipas albininfo.ch.
Gratë nga Kosova kanë zgjedhur të mbeten anonime dhe nuk kanë pranuar publikimin e emrave apo fotografive të tyre. Vendimi gjyqësor ndaj sulmueses, e cila ka pranuar krimin dhe përballet me burgim të përjetshëm, pritet të shpallet këtë të mërkurë. Më shumë detaje rreth rastit këtu.
