Presidenti i SHBA-së, Donald Trump, dhe presidenti rus, Vladimir Putin, do të takohen të premten e ardhshme në Alaskë për të diskutuar mbi të ardhmen e luftës në Ukrainë.
Trump njoftoi takimin e 15 gushtit në rrjetet sociale, dhe më pas lajmi u konfirmua nga një zëdhënës i Kremlinit, i cili tha se vendndodhja ishte “mjaft logjike” duke pasur parasysh afërsinë relative të Alaskës me Rusinë, shkruan BBC, përcjell Katror.info.
Nga Ukraina nuk pati reagim të menjëhershëm.
Mundesh me e lexu edhe...
Njoftimi për takimin erdhi vetëm disa orë pasi Trump kishte lënë të kuptohej se Ukraina mund t’i duhet të heqë dorë nga disa territore për t’i dhënë fund luftës, e cila nisi me pushtimin e plotë të vendit nga Rusia në shkurt 2022.
“Po flasim për territore mbi të cilat është luftuar për tre vjet e gjysmë, shumë rusë kanë vdekur. Shumë ukrainas kanë vdekur,” tha Trump të premten në Shtëpinë e Bardhë. “Është shumë e ndërlikuar. Do të marrim disa territore mbrapsht, do të ketë disa shkëmbime. Do të ketë një ndërrim territoresh, për përfitimin e të dyja palëve.”
Presidenti amerikan nuk dha më shumë detaje se si do të dukej kjo marrëveshje.
Megjithatë, sipas CBS News, që citon burime të njohura me diskutimet, Shtëpia e Bardhë po përpiqet të bindë liderët evropianë të pranojnë një marrëveshje që do t’i lejonte Rusisë të merrte të gjithë rajonin e Donbasit në lindje të Ukrainës dhe të mbante Krimenë.
Si pjesë e propozimit, Rusia do të hiqte dorë nga rajonet Kherson dhe Zaporizhzhia, të cilat aktualisht i kontrollon pjesërisht, raporton CBS.
Më herët të premten, Wall Street Journal raportoi se Putin i kishte propozuar një marrëveshje të ngjashme të dërguarit të Trump-it, Steve Witkoff, gjatë një takimi të fundit në Moskë.
Ende mbetet e paqartë nëse Ukraina dhe aleatët evropianë do të pranonin një marrëveshje të tillë, duke qenë se presidenti ukrainas, Volodymyr Zelensky, dhe Putin mbeten shumë larg në kushtet për paqe. Zelensky ka refuzuar më parë çdo kusht paraprak për dorëzim territoresh.
Një zyrtar i lartë i Shtëpisë së Bardhë i tha CBS se planet për takimin e së premtes së ardhshme janë ende të paqëndrueshme dhe mbetet e mundur që Zelensky të përfshihet në një formë apo tjetër.
Rusia nuk ka arritur të bëjë një përparim vendimtar në pushtimin e plotë, por aktualisht kontrollon rreth 20% të territorit të Ukrainës. Ndërkohë, ofensivat ukrainase nuk kanë arritur ta shtyjnë mbrapsht ushtrinë ruse./Katror.info
Përgatiti:
