Presidenti i sapozgjedhur i SHBA-së, Donald Trump, emëroi Elon Musk të martën në një rol që synon krijimin e një qeverie më efikase, duke i dhënë edhe më shumë ndikim njeriut më të pasur në botë, i cili dhuroi miliona dollarë për të ndihmuar Trumpin të zgjidhej.
Musk dhe ish-kandidati republikan presidencial, Vivek Ramaswamy do të bashkëdrejtojnë një Departament të sapokrijuar të Efikasitetit të Qeverisë, një entitet që Trump tregoi se do të operojë jashtë kufijve të qeverisë, raporton Reuters.
Trump tha në një deklaratë se Musk dhe Ramaswamy “do t’i hapin rrugën administratës sime për të çmontuar burokracinë qeveritare, për të ulur rregulloret e tepërta, për të shkurtuar shpenzimet e kota dhe për të ristrukturuar Agjencitë Federale”.
Mundesh me e lexu edhe…
Trump tha se departamenti i ri do të realizojë ëndrrat e kahershme republikane dhe do të “sigurojë këshilla dhe udhëzime nga jashtë qeverisë”, duke sinjalizuar se rolet e Musk dhe Ramaswamy do të ishin joformale, pa kërkuar miratimin e Senatit dhe duke lejuar Musk të mbetet kreu i kompanisë së makinave elektrike Tesla.
Departamenti i ri do të punojë me Shtëpinë e Bardhë dhe Zyrën e Menaxhimit dhe Buxhetit për të “drejtuar reforma strukturore në shkallë të gjerë dhe për të krijuar një qasje sipërmarrëse” ndaj qeverisë që nuk është parë më parë, tha Trump.
Puna do të përfundonte më 4 korrik 2026 – në 250 vjetorin e nënshkrimit të Deklaratës së Pavarësisë.
Musk, i renditur nga Forbes si personi më i pasur në botë, tashmë do të përfitonte nga fitorja e Trump, me sipërmarrësin miliarder që pritet të ushtrojë ndikim të jashtëzakonshëm për të ndihmuar kompanitë e tij dhe për të siguruar trajtim të favorshëm nga qeveria.
Përgatiti:
