UEFA prezanton formatin e ri të Champions League

UEFA ka prezantuar këtë të mërkurë formatin e ri të kompeticionit më të rëndësishëm për klube në Evropë, Champions League. Ai do të fillojë zbatimin nga sezoni i ardhshëm 2024-25.

“Ka një arsye që futbolli evropian është një nga sportet më të suksesshme dhe më të njohura në botë. Nuk qëndron kurrë në vend”, thotë UEFA në njoftimin e saj.

Që nga fillimi i kompeticionit inaugurues, i njohur si Kupa e Kampionëve Evropianë të Klubeve, në vitin 1955, UEFA ka evoluar vazhdimisht dhe ka përshtatur Champions League-n për të mbajtur ritmin me ndryshimet më të gjera në lojë.

Formati i ri përfundimtar, lista e aksesit dhe kalendari për garat evropiane të klubeve u miratua më 10 maj 2022, në vijim të vendimit të UEFA-s të datës 19 prill 2021 për të futur një sistem të ri garash.

“UEFA ka treguar qartë se ne jemi plotësisht të përkushtuar për të respektuar vlerat themelore të sportit dhe për të mbrojtur parimin kyç të garave të hapura, me kualifikim të bazuar në meritat sportive, plotësisht në përputhje me vlerat dhe modelin sportiv evropian të bazuar në solidaritet”, tha presidenti i UEFA-s, Aleksander Ceferin.

“Jam vërtet i kënaqur që ishte një vendim unanim i Komitetit Ekzekutiv të UEFA-s, me Asociacionin Evropian të Klubeve, Ligat Evropiane dhe shoqatat kombëtare që të gjitha pajtohen me propozimin e bërë. Një tjetër dëshmi se futbolli evropian është më i bashkuar se kurrë”, shtoi slloveni.

Si do të ndryshojë formati i Champions League nga 2024-25?

Ndryshimi kryesor në reformat e shpallura nga Komiteti Ekzekutiv i UEFA-s është largimi nga sistemi aktual i fazës së grupeve. Faza e tanishme e grupeve të Champions League përfshin 32 pjesëmarrës të ndarë në tetë grupe me nga katër.

Nga sezoni 2024-25, 36 klube do të marrin pjesë në fazën e Champions League (ish-faza e grupeve), duke i dhënë mundësinë katër skuadrave të tjera të konkurrojnë kundër klubeve më të mira në Evropë. Këto 36 klube do të marrin pjesë në një garë të vetme lige në të cilën të 36 klubet konkurruese renditen së bashku.

Sipas formatit të ri, skuadrat do të luajnë tetë ndeshje në fazën e re të ligës (ish-faza e grupeve). Ata nuk do të luajnë më tre kundërshtarë dy here, në shtëpi dhe jashtë, por do të përballen me ndeshje kundër tetë skuadrave të ndryshme, duke luajtur gjysmën e atyre ndeshjeve në shtëpi dhe gjysmën e tyre jashtë.

Për të përcaktuar tetë kundërshtarët e ndryshëm, skuadrat fillimisht do të renditen në katër vazo. Çdo skuadër më pas do të hidhet në short për të luajtur me dy kundërshtarë nga secila prej këtyre vazove, duke luajtur një ndeshje kundër një ekipi nga secila vazo në shtëpi dhe një jashtë.

Kjo u jep mundësinë klubeve të testojnë veten kundër një game më të gjerë kundërshtarësh dhe rrit mundësinë për tifozët që të shohin skuadrat më të mira të shkojnë ballë për ballë më shpesh dhe më herët në garë.

Si do të ndahen katër vendet shtesë në Champions League?

Kualifikimi për në Champions League do të vazhdojë të jetë i hapur dhe do të varet nga pozicioni përfundimtar i një klubi në kompeticionin e ligës vendase të sezonit të mëparshëm, i kombinuar me pozicionin e secilës shoqatë në renditjen e koeficientit të klubeve të shoqatës.

Baza e listës së aksesit do të mbetet e njëjtë si për sezonin aktual, dhe katër vendet shtesë të disponueshme në 2024-25 do të ndahen si më poshtë:

Vendi i parë: Ky vend do t’i shkojë klubit të renditur i treti në kampionatin e shoqatës në pozitën e pestë në listën e aksesit, e cila përcaktohet nga renditja e koeficientit të klubeve të shoqatës UEFA.

Vendi i dytë: Ky vend do t’i jepet një kampioni vendas duke e zgjeruar nga katër në pesë numrin e klubeve që kualifikohen përmes rrugës Champions të procesit kualifikues të kompeticionit, i cili do të përbëhet nga katër raunde kualifikuese.

Vendet e treta dhe të katërta: Këto vende do t’u shkojnë shoqatave me performancën më të mirë kolektive nga klubet e tyre në sezonin e kaluar. Këto dy shoqata do të fitojnë secila nga një vend automatikisht për klubin që renditet më i miri në ligën e tyre vendase pas atyre që tashmë janë kualifikuar drejtpërdrejt.

Si do të arrijnë skuadrat në fazën eliminatore të Champions League dhe a do të ndryshojë formati?

Rezultatet e çdo ndeshje do të vendosin renditjen e përgjithshme në ligën e re, me tre pikë për fitore dhe një për barazim.

Tetë skuadrat më të mira në ligë do të kualifikohen automatikisht në raundin e 16-të, ndërsa skuadrat që përfundojnë në vendin e 9-të deri në vendin e 24-të do të garojnë në një fazë play-off me dy ndeshje për të siguruar rrugën e tyre për në 16-shen e fundit të kompeticionit.

Skuadrat që përfundojnë në vendin e 25-të ose më poshtë do të eliminohen, pa akses në UEFA Europa League.

Nga raundi i 16-të e tutje, gara do të vazhdojë të ndjekë formatin e saj ekzistues të raundeve me eliminim direkt që çon në finalen e zhvilluar në një vend neutral të përzgjedhur nga UEFA.

Të gjitha ndeshjet para finales do të vazhdojnë të luhen në mesjavë, ndërsa finalja do të vazhdojë të luhet të shtunën./Katror.info