Kompania Rajonale e Ujësjellësit “Prishtina” ka bërë të ditur se në mostrat e fundit të ujit të marrë nga liqeni akumulues i Badocit është vërejtur rritje e nivelit të manganit, duke ndikuar edhe në rrjetin shpërndarës.
Sipas njoftimit, rezultatet laboratorike të datës 1 shtator 2025 të Institutit Kombëtar të Shëndetësisë Publike të Kosovës (IKSHPK) tregojnë tendencë në rritje të përqendrimit të manganit. Edhe pse vlerat e regjistruara e tejkalojnë kufirin e paraparë në Udhëzimin Administrativ për cilësinë e ujit të pijshëm, ato ende nuk kanë kaluar standardin shëndetësor që mund të rrezikojë drejtpërdrejt shëndetin e njeriut.
Megjithatë, për mbrojtjen e qytetarëve, IKSHPK ka apeluar që uji i furnizuar nga Fabrika e Badocit të mos përdoret për pije deri në një njoftim tjetër. Instituti thekson se ndotja me mangan është kimike dhe se vlimi i ujit nuk e eliminon atë. Uji mund të përdoret vetëm për pastrim, mirëmbajtje të higjienës personale dhe të hapësirave të banimit.
Mundesh me e lexu edhe…
Ndërkohë, KRU “Prishtina” ka marrë masa emergjente për të ulur sasinë e prodhimit, për të ruajtur cilësinë e furnizimit dhe për të intensifikuar shpëlarjen e rrjetit shpërndarës. Po ashtu, kompania ka paralajmëruar se zonat e prekura do të furnizohen me ujë të pijshëm përmes autoboteve, sipas një orari të përcaktuar.
IKSHPK dhe KRU “Prishtina” kanë theksuar se monitorimi i cilësisë së ujit do të vazhdojë pa ndërprerje, deri në stabilizimin e situatës./Katror.info
