Një arritje historike për muzikën elektronike dhe për Shqipërinë: UNUM Festival është shpallur “Festivali më i Mirë Global për vitin 2025” nga The DJ Awards Ibiza, një nga organizatat më prestigjioze në botë që vlerëson arritjet më të larta në industrinë e muzikës elektronike, raporton BalkanWeb.
Ky çmim e rendit UNUM-in përkrah emrave legjendarë të skenës ndërkombëtare si Burning Man, Tomorrowland, Sonus dhe Kappa Futur Festival, duke e vendosur Shqipërinë në qendër të hartës globale të eventeve muzikore.
Nga një ëndërr në një simbol global
Mundesh me e lexu edhe…
I themeluar në vitin 2019, UNUM Festival lindi si një ëndërr për të sjellë në Shqipëri energjinë, artin dhe kulturën ndërkombëtare të muzikës elektronike, duke ruajtur në të njëjtën kohë autenticitetin e bregdetit shqiptar.
Në vetëm pesë edicione, festivali është shndërruar në një fenomen ndërkombëtar, që tërheq çdo vit mijëra vizitorë nga mbi 60 vende të botës.
Plazhi magjik i Rana e Hedhun në Shëngjin ka qenë skena ku lind dielli bashkë me tingujt e muzikës, duke krijuar një përvojë unike që kombinon natyrën, artin dhe komunitetin në mënyrë harmonike.
Edicioni i 2025: Një lineup i yjeve botërorë
Edicioni i pestë i UNUM Festival, i mbajtur në qershor 2025, solli një lineup mbresëlënës me disa prej emrave më të mëdhenj të muzikës elektronike:
Black Coffee, Bedouin, Ricardo Villalobos, Seth Troxler, Dixon, Carlita, Damian Lazarus, Rhadoo, Raresh, Priku, Arapu dhe shumë të tjerë – një kombinim që bashkoi skenat më të njohura të globit në një vend të vetëm: Shqipëri.
Një sukses që tejkalon kufijtë
Ky vlerësim nga DJ Awards Grand Jury nuk është vetëm një çmim për festivalin, por një simbol i transformimit të Shqipërisë në një destinacion të ri për turizmin kulturor dhe muzikor.
UNUM ka dëshmuar se Shqipëria mund të konkurrojë me vendet më të zhvilluara në fushën e eventeve të mëdha, duke ofruar organizatë profesionale, përvojë unike për vizitorët dhe energji që s’gjendet askund tjetër.
Organizatorët e festivalit janë shprehur jashtëzakonisht mirënjohës për këtë vlerësim:
“Ky çmim është fryt i pasionit, punës së palodhur dhe besimit që kemi ndërtuar së bashku me artistët, partnerët dhe mbi të gjitha me familjen UNUM. Është një ëndërr e bërë realitet dhe një moment historik për Shqipërinë.”
Shqipëria, destinacion i ri për festivalet globale
UNUM Festival ka krijuar një model të ri zhvillimi për industrinë e eventeve në Ballkan, duke ndikuar drejtpërdrejt në promovimin e turizmit, ekonomisë lokale dhe imazhit ndërkombëtar të vendit.
Falë këtij suksesi, Shqipëria tashmë po shihet si një destinacion i ardhshëm për turizmin e muzikës elektronike, me interes në rritje nga mediat, artistët dhe kompanitë e mëdha ndërkombëtare.
Organizatorët kanë paralajmëruar se edicionin e vitit 2026 do ta shënojë një kapitull të ri, me produksion edhe më të madh, bashkëpunime ndërkombëtare dhe përvoja të reja për publikun.
Një trofe që shënon historinë
Fitimi i “Global Festival Award 2025” është dëshmi e faktit se vizioni dhe bashkimi mund ta çojnë një ide lokale në një arritje botërore.
UNUM Festival nuk është më thjesht një event është një lëvizje që bashkon njerëz nga e gjithë bota përmes muzikës dhe shpirtit të lirisë.
Ky çmim është kupa që mban emrin e Shqipërisë në skenën globale dhe një ftesë për të gjithë botën që të zbulojë magjinë e UNUM-it, aty ku muzika, deti dhe natyra bëhen një./BalkanWeb
Përgatiti:
