Universiteti i Prishtinës ka shpallur thirrjen për angazhimin e personelit akademik që punon dhe ka studiuar në 400 Universitetet më të ranguara globale, të cilët dëshirojnë të angazhohen dhe kontribuojnë në ngritjen cilësore të arsimit, kërkimit dhe shoqërisë në Kosovë.
Kjo thirrje vjen pas miratimit të Rregullores për transferim, programin “Brain Gain” dhe rastet e nevojës së jashtëzakonshme të rekrutimit të personelit akademik, që u miratua në mbledhjen e Senatit të UP-së, më 30.04.2025.
Qëllimi i kësaj Rregulloreje është rekrutimi i kandidatëve të cilët punojnë apo të cilët kanë përfunduar së paku një apo më tepër nivele studimi jashtë vendit, në një Universitet që është në mesin e 400 Universiteteve më të mira në botë – sipas renditjes së bërë nga “Times Higher Education” (Arsimi i Lartë sipas Times) ose “QS World University Rankings” (Renditja Botërore e Universiteteve sipas QS – Quacquarelli Symonds).
Mundesh me e lexu edhe…
Këta kandidatë kanë të drejtë transferimi në Universitetin e Prishtinës pa iu nënshtruar procedurave të Konkursit publik.
“Nëse e plotësoni këtë kusht dhe dëshironi të jeni pjesë e personelit akademik të Universitetit të Prishtinës transferimi juaj do të mund të bëhet me procedurë të veçantë dhe pa iu nënshtruar rregullave të përcaktuara të Konkurseve.” – thuhet në Njoftimin e UP-së, më 21.05.2025.
Sipas UP-së mundësia për të aplikuar në këtë thirrje dhe për t’u bërë pjesë e personelit akademik të Universitetit të Prishtinës do të jetë e hapur gjatë tërë vitit.
“Kjo thirrje synon të krijojë ura bashkëpunimi me profesionistët tanë në diasporë, qofshin ata të interesuar për angazhim të drejtpërdrejtë në Kosovë, apo për kontribut nga distanca, përmes formave të ndryshme të përfshirjes akademike. Ju presim me duar e zemër të hapur për një angazhim e punë të përbashkët për zhvillimin e Universitetit të Prishtinës.” – kanë shtuar nga UP.
UP nuk ka pasur një Rregullore të veçantë për Programin “Brain Gain”, që ka për qëllim përcaktimin e kritereve për transferimin e nivelit akademik që bëjnë pjesë në 400 Universitetet më të mira në botë.
Edhe në bazë të Nenit 151 të Statutit të UP-së parashihet që zgjedhja e personelit akademik si pjesë e Programit “Brain Gain” të rregullohet përmes një Rregulloreje të veçantë të Senatit.
Rregulloren për transferim, programin “Brain Gain” dhe rastet e nevojës së jashtëzakonshme të rekrutimit të personelit akademik mund ta gjeni në këtë link. /Katror.info
Përgatiti:
