Alpinistja nga Kosova, Uta Ibrahimi, është shqiptarja e parë dhe personi i parë nga Ballkani që ka përfunduar ngjitjen e të gjitha 14 majave mbi 8 mijë metra të vargmalit të Himalajeve, ndryshe njohët edhe si “çatia e Tokës”. Me arritjen në majën e Kangchenjungës (8,586 m), maja e tretë më e lartë në botë, ajo përmbylli një mision alpin të rrallë dhe historik në nivel global, shkruan albinfo.ch.
Projekti i saj, “Utalaya 14×8000”, nisi në maj të vitit 2017 me ngjitjen e Everestit dhe zgjati tetë vite, duke përfshirë sfida ekstreme natyrore, kushte të vështira atmosferike dhe rreziqe të vazhdueshme për jetën. Megjithatë, Ibrahimi arriti të përballojë të gjitha këto, duke sjellë një histori suksesi që tejkalon dimensionin sportiv dhe frymëzon më gjerë.
“Unë nuk u ngjita vetëm për të parë botën nga lart. U ngjita që ta bëj botën të shohë prej nga vij,” u shpreh Uta Ibrahimi në një deklaratë për mediat pas përfundimit të ekspeditës së saj të fundit.
Mundesh me e lexu edhe…
Me këtë arritje, ajo i bashkohet një grupi shumë të vogël alpinistësh në botë që kanë përfunduar të ashtuquajturën “kurorën e Himalajeve” – një ndër sfidat më ekstreme të alpinizmit modern. Më pak se 50 persona në botë e kanë përmbyllur këtë mision deri më sot.
Përveç përmasës personale dhe kombëtare, suksesi i Ibrahimit mbart edhe një mesazh të fortë shoqëror dhe edukativ. Përmes Fondacionit të saj “Utalaya” dhe aktiviteteve të shumta në mbështetje të zhvillimit të qëndrueshëm dhe të barazisë gjinore, ajo është angazhuar që të nxisë të rinjtë – veçanërisht vajzat – të ndjekin ëndrrat dhe të kapërcejnë kufizimet shoqërore.
“Çdo majë është një betejë e fituar për ne që lindëm të përjashtuar. Dhe çdo fitore është një ftesë për të guxuar më shumë,” theksoi ajo në përmbyllje të ekspeditës.
Ngjitja e 14 majave të Himalajeve nuk është vetëm një sukses sportiv për një individ, por edhe një dëshmi e asaj që mund të arrihet kur vizioni, përkushtimi dhe guximi bashkohen në një qëllim të lartë. Emri i Uta Ibrahimit tashmë zë një vend të merituar në historinë e alpinizmit botëror dhe në atë të krenarisë mabrëshqiptare./Katror.info
Përgatiti:
