Presidentja e Republikës së Kosovës, Vjosa Osmani, ka njoftuar përmes një postimi se Administrata e Shteteve të Bashkuara të Amerikës ka miratuar zyrtarisht vazhdimin e Kompaktit të Korporatës së Sfidës së Mijëvjeçarit (MCC) për Kosovën.
Ky vendim u konfirmua gjatë një takimi të mbajtur në Washington D.C. nga Zëvendës Sekretari amerikan i Shtetit, Christopher Landau, i cili e informoi Presidenten Osmani për miratimin nga ana e Administratës Trump të këtij programi me ndikim të madh për vendin.
Presidentja e cilësoi këtë si një lajm të shkëlqyeshëm për Kosovën, duke theksuar rëndësinë e Kompaktit të MCC për transformimin e sektorit të energjisë dhe për zhvillimin ekonomik të qëndrueshëm. Ajo shprehu mirënjohje të thellë për mbështetjen e vazhdueshme të Shteteve të Bashkuara të Amerikës ndaj Kosovës.
Mundesh me e lexu edhe…
Programi MCC për Kosovën pritet të sjellë investime të rëndësishme në energji të pastër, qëndrueshmëri infrastrukturore dhe përmirësim të kushteve për zhvillim ekonomik afatgjatë./Katror.info
