Eksplorimi i një vendi me makinë mund të jetë një eksperiencë e mrekullueshme, sidomos kur infrastruktura është cilësore, ka shumë stacione për t’u furnizuar me karburant, vende parkimi publike dhe rrugë të mirëmbajtura.
DiscoverCars.com ka përgatitur një renditje të vendeve ku është më e lehta për të ngarë makinën në Europë, duke u bazuar në investimet për rrugë për frymë, numrin e makinave, sinjalistikën, stacionet e shërbimit dhe parkimet publike.
1. Spanja
Mundesh me e lexu edhe...
Spanja kryeson listën me 95 pikë nga 130. Investimi për rrugë arrin 230 euro për frymë, me 16,431 stacione furnizimi me karburant.
Edhe pse ka 34 milionë makina, ofron përvoja të ndryshme: nga Madrid i mbipopulluar deri te zonat malore të qeta.
Rekomandohet “Grand Tour of Catalonia”, një itinerar 2000 km i ndarë në seksione për të eksploruar qytete historike si Tarragona.
2. Franca
Franca renditet e dyta me 86 pikë. Investimi në rrugë është 345 euro për frymë, 10,806 stacione karburanti dhe 8,233 parkime publike.
Me 39 milionë makina, vendi kombinon qytete të dendura si Parisi dhe zona më të qeta si “diagonale du vide”, brezi i gjerë i Francës që shtrihet nga jugperëndimi në verilindje të vendit dhe që karakterizohet nga dendësi e ulët popullsie, emigrim të brendshëm dhe pak zhvillim ekonomik..
Për një përvojë udhëtimi të paharrueshme vizitoni Luginën e Luarës, me kështjella dhe qytete historike.
3. Norvegjia
Me 82 pikë dhe investimin më të lartë për frymë në Europë (928 euro), ka vetëm 2.8 milionë makina të regjistruara.
Rekomandohet rruga panoramike Rondane, midis Oslos dhe Trondheim, që kalon në Parkun Kombëtar Rondane. Megjithatë, duhet pasur kujdes nga gjobat e larta për shpejtësi.
4. Mbretëria e Bashkuar, Holanda dhe Finlanda
Të tre vendet morën nga 79 pikë secili, duke u renditur në vend të katërt. Në Mbretërinë e Bashkuar ka 34 milionë makina, por me 36,950 parkimi dhe 8,353 stacione. Një itinerar i njohur është North Coast 500 në Highland-et skoceze.
Holanda ka 9.4 milionë makina, investime 405 euro për frymë, 6,045 stacione furnizimi me karburant. Rekomandohet Mergelland Route 110 km në Limburg.
Finlanda ka vetëm 3.2 milionë makina, investime 376 euro për frymë. Një udhëtim i njohur është nga Pori në Oulu përgjatë bregut perëndimor, me qytete historike prej druri si Kristinestad.
5. Austria
Me 78 pikë, ka 5.2 milionë makina dhe investime 761 euro për frymë (vetëm pas Norvegjisë). Rekomandohet “Austrian Romantic Road”, 380 km nga Vjena në Salzburg, përgjatë Danubit, me male, liqene dhe qytete të vogla piktoreske.
Pjesa tjetër e renditjes përbëhet nga Serbia (76 pikë), Portugalia dhe Polonia (74 pikë), Suedia (73 pikë), Kroacia dhe Gjermania (72 pikë), Italia dhe Zvicra (71 pikë).
Ky klasifikim tregon se investimet në infrastrukturë, kombinimi i dendësisë së makinave dhe cilësisë së shërbimeve ndihmojnë, që disa vende europiane të ofrojnë një eksperiencë drejtimi më të këndshme e të sigurt për udhëtarët. /shqip.al/Katror.info
