Veshjet tradicionale shqiptare në skenën e madhe të Oktoberfest-it.
Më 21 shtator 2025, për herë të parë në historinë e saj, kultura dhe veshjet tradicionale shqiptare do të prezantohen në parakalimin madhështor të Oktoberfest-it në Mynih, i njohur si Trachten- und Schützenzug, shkruan albinfo.ch..
Ky moment historik u bë i mundur falë angazhimit të Shoqatës “Iliria München”, me mbështetjen e Republikës së Kosovës. Përmes këtij prezantimi, komuniteti shqiptar do të ketë mundësinë të shpalosë rrënjët, traditat dhe trashëgiminë kulturore para mijëra pjesëmarrësve dhe miliona shikuesve në mbarë botën.
Mundesh me e lexu edhe…
Pjesëmarrësit do të parakalojnë me kostumet kombëtare shqiptare, duke sjellë ngjyrat dhe simbolikat e kulturës sonë në një prej ngjarjeve më të mëdha folklorike e kulturore evropiane. Ky prezantim nuk përfaqëson vetëm një arritje për Shoqatën “Iliria München”, por edhe një moment krenarie për të gjithë komunitetin shqiptar në diasporë.
“Ky është një moment shumë i veçantë e historik, jo vetëm për shoqatën tonë, por për mbarë komunitetin shqiptar. Pjesëmarrja dhe mbështetja e të gjithëve do të na gëzojë në këtë ditë të rëndësishme,” – thekson Shoqata “Iliria München”. /Katror.info
