U mbajt ceremonia e vendosjes së gurthemelit për ndërtimin e një çerdheje për fëmijë në lagjen Bardhosh të Prishtinës, e cila do t’u shërbejë 120 fëmijëve të kësaj zone, raporton Ekonomia Online.
Projekti do të realizohet nga Ministria e Arsimit, e Shkencës, e Teknologjisë dhe e Inovacionit (MASHTI), me një kosto të përafërt prej 1.168.000 euro.
Kryeministri në detyrë i Republikës së Kosovës, Albin Kurti, gjatë fjalës së tij në ceremoni, theksoi rëndësinë e investimeve në edukim dhe, siç tha, theu rekorde krahasuar me qeveritë e mëhershme sa i përket ndërtimit të çerdheve.
“Vëmë gurthemelin e një çerdheje të re për fëmijë, e cila do të jetë për 120 fëmijë, do të kushtojë përafërsisht 1 milion e 168 mijë euro. Do të ketë një sipërfaqe prej përafërsisht 1552 metra katrorë. Punimet do të kryhen për 36 muaj apo për tri vjet. Jemi të përkushtuar për arsim për shkak se dinjiteti i njerëzve, harmonia në shoqëri, shëndeti në familje varen aq shumë prej edukimit dhe prej arsimimit. I gjithë investimi është i MASHT-it. Ky gurthemel është gurthemeli i 71-të i çerdheve që i kemi bërë në këtë mandatin tonë mbi katër vjeçar tashmë. Për 18 vjet, qeveritë para neve i kanë bërë vetëm 4 çerdhe gjithsej,” tha Kurti.
Ndërsa, ministrja në detyrë e Arsimit, Arbërie Nagavci, theksoi se projekti vjen si përgjigje ndaj nevojave të banorëve të lagjes Bardhosh dhe se tashmë janë tejkaluar të gjitha pengesat për nisjen e ndërtimit.
“Ne jemi në këtë fshat që ka numër të madh të banorëve dhe ku është e nevojshme ndërtimi i një çerdheje të re. Jam e lumtur që janë tejkaluar të gjitha sfidat. Brenda 36 muajve do të finalizohet kjo çerdhe,” tha Nagavci./EO/Katror.info
