Në Prishtinë është vërejtur një rritje e lehtë e rasteve me viroza, me simptoma të zakonshme si kollitje, rrjedhje hundësh, temperaturë dhe dhimbje muskujsh, ka bërë të ditur specialisti i Mjekësisë Familjare, Rushit Ismaili, në një intervistë për Ekonomia Online.
Ismaili tha se këto raste zakonisht janë të lehta dhe kalojnë brenda pak ditësh, nëse pacientët kujdesen për veten dhe qëndrojnë në pushim. Ai rekomandoi që të prekurit të qëndrojnë në shtëpi për të paktën tre ditë, të konsumojnë shumë lëngje, çaj dhe supë, si dhe të përdorin paracetamol në rast temperature.
“Simptomat më të shpeshta janë kollitja, shkuarja e hundëve, temperatura dhe dhimbjet e muskujve. Këto janë raste të lehta, që menaxhohen në kushte shtëpie. Më e mira është që të qëndrohet në shtëpi, të mos dilet dhe të mos transmetohet virusi te të tjerët,” tha Ismaili.
Mundesh me e lexu edhe…
Mjeku apeloi gjithashtu për kujdes të shtuar ndaj higjienës personale, përdorimin e maskave dhe shmangien e kontakteve të panevojshme, duke theksuar se këto masa ndihmojnë në parandalimin e përhapjes së infeksioneve.
Një ndër mënyrat më të sigurta për parandalim, sipas tij, është vaksinimi kundër gripit. Ai bëri thirrje që qytetarët të vaksinohen sa më shpejt, duke njoftuar se vaksina kundër gripit tashmë është në dispozicion në Qendrën e Mjekësisë Familjare dhe në të gjitha qendrat tjera të ngjashme në vend.
“Është periudha kur vaksina kundër gripit jepet më shpesh. Ftoj qytetarët që nuk e kanë marrë ende, ta marrin sa më parë. Ne po i informojmë pacientët për përfitimet e vaksinimit dhe kemi shpërndarë edhe fletushka për këtë qëllim,” theksoi Ismaili.
Ai përmbylli me një apel për kujdes të vazhdueshëm: larje të duarve, përdorim të faculetave të pastra gjatë teshtimës, si dhe konsumim të ushqimeve të balancuara dhe frutave e perimeve të lara mirë.
“Këto janë mënyrat më të mira për të parandaluar përhapjen e viruseve dhe për ta kaluar më lehtë një virozë,” përfundoi doktori./EO/Katror.info.
