Agjencia e Statistikave të Kosovës [ASK], në muajin e fundit të vitit 2024, tregojnë për një ndryshim në numrin e përfituesve të skemave sociale e të pensioneve. Sipas statistikave, në disa kategori numri i tyre pësoi rënie e në disa të tjera pati rritje.
Rënie të numrit të përfituesve pati tek pensionet e Trepçës, pensionet invalidore, të ndihmave sociale, te skema për familjet e dëshmorëve dhe invalidëve të luftës si dhe pensionet kontribut-paguese të moshës, raporton Kallxo.com.
“Në muajin dhjetor 2024, krahasuar me muajin dhjetor 2023, kishte rënie të numrit të përfituesve nga: skema për pensionet e Trepçës (-20,8%); skema për pensionet invalidore (-14,9%); skema e ndihmës sociale (-11,1%); skema për pensionet familjare (-3,9%); skema e kompensimeve për personat e verbër (-2,1%); skema për familjet e dëshmorëve dhe invalidët e luftës (-1,7%); skema e pensioneve kontribut-paguese të moshës (-1,3%)”- njofton ASK.
Mundesh me e lexu edhe…
Në anën tjetër, ASK rendit skemat e pensioneve ku pati rritje të numrit të përfituesëve.
“Në muajin dhjetor 2024, krahasuar me muajin dhjetor 2023 kishte rritje të numrit të përfituesve nga: skema për përkrahje financiare familjeve që kanë fëmijë me aftësi të kufizuara(14,5); skema e pensioneve të Forcës së Sigurisë së Kosovë (11,9%); skema e kompensimit për punëtorët e arsimit që punuan gjatë vitit shkollor 1990/91 deri në vitin shkollor 1998/99 (5,1%); skema e pensioneve të Trupave Mbrojtëse të Kosovës (TMK) (3,9%); skema për Pensionet Paraplegjike dhe Tetraplegjike (2,9%); skema e pensioneve për personat me aftësi të kufizuara (2,9%); skema e pensioneve bazike të moshës (2,9%); skema për veteranët e luftës (0,3%)”- tregon ASK
Lidhur me pensionet, në konferencën e datës 10.01.2025, u bë e ditur se Qeveria e Kosovës miratoi Vendimin për rritjen për 20% të pensioneve për kategoritë e dala nga lufta e fundit, derisa ministri i Financave Hekuran Murati para mediave u shpreh se kjo bëhet për shkak të rritjes ekonomike.
Po ashtu, më 07.10.2024, kryeministri i Kosovës, Albin Kurti kishte njoftuar se janë rritur pensionet për disa skema pensionale.
Kurti kishte rritur pensionet 20% për pensionin bazik, kontribut-dhënësit, personat me aftësi të kufizuara, personat paraplegjikë dhe tetraplegjikë e personat e verbër, invalidor i punës dhe për ish-punëtorët e Trepçës.
Me këtë rritje pensioni bazik u bën nga 100 euro në 120 euro. /Katror.info
Përgatiti:
